Հայաստանի նորություններ

ՀՈՒԼԻՍԻ 22-ԻՆ ԵՐԵՒԱՆՈՒՄ ԿՄԵԿՆԱՐԿԻ «ՌՈՒԲԵԺ-2008» ՀՐԱՄԱՆԱՏԱՐԱՇՏԱԲԱՅԻՆ ԶՈՐԱՎԱՐԺՈՒԹՅՈՒՆՆԵՐԻ ԱՌԱՋԻՆ ՓՈՒԼԸ
Երեւան (Երկիր) - ՀՀ ազգային անվտանգության խորհրդի քարտուղար Արթուր Բաղդասարյանը հունիսի 20-ին անցկացրել է աշխատանքային խորհրդակցություն, որին մասնակցել են Հավաքական անվտանգության պայմանագրի կազմակերպության Հայաստանի տարածքում անցկացվելիք «Ռուբեժ-2008» համատեղ հրամանատարաշտաբային զորավարժություններում ներգրավված պետական կառավարման մարմինների օպերատիվ խմբերի ղեկավարները:

Ինչպես տեղեկացնում են ՀՀ նախագահի մամուլի գրասենյակից, խորհրդակցության ընթացքում տրվել են համապատասխան հանձնարարականներ եւ պարզաբանումներ առաջիկա զորավարժություններին պատշաճ կերպով նախապատրաստվելու եւ դրանց անցկացման ուղղությամբ: Զորավարժությունների առաջին փուլը կմեկնարկի հուլիսի 22-ին` Երեւանում:

Հայաստանի նորություններ
ՀՀ ԱԳՆ հաստատել է Սուդանում ավիավթարի ժամանակ հայ օդաչուի մահը
17:03 | 28/ 06/ 2008

ԵՐԵՎԱՆ, 28 հունիսի. /Նովոստի-Արմենիա/. ՀՀ ԱԳՆ-ն հաստատել է հայ օդաչուի մահը՝ նախօրեին Սուդանում տեղի ունեցած ԱՆ-12 բեռնատար ինքնաթիռի ավիավթարի ժամանակ։

Ինչպես շաբաթ «Նովոստի-Արմենիա» գործակալությանը հայտնեց ՀՀ ԱԳՆ մամուլի և տեղեկատվության վարչության ԶԼՄ-ների հետ կապերի բաժնի պետ Տիգրան Բալայանը, աձնակազմի մահացած յոթ անդամներից մեկն, իսկապես, Հայաստանի քաղաքացի է։

Բալայանը ձեռնպահ է մնացել տալ մահացած հայ օդաչուի անունը՝ հայտնելով, որ նրա մարմինն ուղարկվել է ճանաչման։

Ինչպես հայտնում են արտասահմանյան ԶԼՄ-ները՝ հղում անելով Սուդանի ավիացիայի ղեկավարներին, դեպքը տեղի է ունեցել ուրբաթ՝ մեկ ժամ և տաս րոպե անց այն բանից հետո, երբ ինքնաթիռը օդ է բարձրացել Խարտումից։ Ենթադրվում է, որ ավիավթարի պատճառը եղանակային անբարենպաստ պայմաններն են եղել։

«Ջուբա Այրկարգո» ընկերությանը պատկանող ինքնաթիռում եղել են անձնակազմի ութ անդամներ,որոնցից յոթը զոհվել է։ Զոհվածների թվում են Սուդանի երկու քաղաքացի, Ուկրաինայի չորս քաղաքացի և Հայաստանի մեկ քաղաքացի։-

Ղարաբաղի մասնակցությունը բանակցություններին ժամանակի խնդիր է. ԵԱՀԿ Մինսկի խմբի համանախագահներ
ԼՂՀ Նախագահ Բակո Սահակյանը և ԵԱՀԿ Մինսկի խմբի համանախագահներ Մեթյու Բրայզան /ԱՄՆ/, Յուրի Մերզլյակովը /ՌԴ/ և Բեռնար Ֆասիեն /Ֆրանսիա/ քննարկել են ղարաբաղյան հակամարտության կարգավորմանն առնչվող հարցերի լայն շրջանակ:

Հանդիպմանը Սահակայնը նշել է, որ առանց բանակցային գործընթացին ԼՂՀ մասնակցության հնարավոր չէ հասնել հիմնախնդրի վերջնական կարգավորմանը:

Նա ընդգծել է, որ Ադրբեջանում առկա հակահայկական քարոզչությունը և ռազմատենչ հայտարարությունները ոչ միայն չեն նպաստում կողմերի միջև փոխվստահության մթնոլորտի ձևավորմանը, այլև խիստ բացասաբար են ազդում բանակցային գործընթացի և տարածաշրջանում խաղաղության ու կայունության պահպանման վրա:

Նախագահը նշել է, որ դրա վկայությունը ս.թ. մարտի 4-ին Ադրբեջանի զինված ուժերի կողմից Մարտակերտի շրջանում հրահրված ռազմական գործողություններն էին:

Նա ևս մեկ անգամ փաստել է, որ պաշտոնական Ստեփանակերտը կողմնակից է բացառապես խաղաղ ճանապարհով հակամարտության կարգավորմանը և Բաքվի հետ անմիջական երկխոսության հաստատմանը:

Սահակյանը նաև նշել է, որ ղարաբաղյան հիմնախնդիրը պետք է կարգավորվի ԵԱՀԿ Մինսկի խմբի շրջանակներում և այն այլ ատյաններ տեղափոխելու Ադրբեջանի փորձերը չեն նպաստում հակամարտության կարգավորմանը:

Համանախագահները կիսել են ԼՂՀ նախագահի այս տեսակետը: Նրանք նաև պատրաստակամություն են հայտնել ըստ ամենայնի աջակցել ղարաբաղյան հակամարտության խաղաղ կարգավորմանը, նշելով, բանակցային գործընթացին ԼՂՀ մասնակցությունը ժամանակի հարց է:

Հանդիպմանը ներկա էր ԼՂՀ արտաքին գործերի նախարար Գեորգի Պետրոսյանը, ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպշիկը:

Հայաստանի նորություններ
Թուրքիայի և Հայաստանի ներկայացուցիչները անդրկուլիսային բանակցություններ են վարել հարաբերությունների նորմալացման վերաբերյալ
16:50 | 18/ 07/ 2008

ԵՐԵՎԱՆ, 18 հուլիսի. /Նովոստի-Արմենիա/. Թուրքիայի և Հայաստանի ներկայացուցիչները գաղտնի բանակցություններ են վարել՝ նվիրված երկու երկրների միջև հարաբերությունների կարգավորմանը, ուրբաթ հայտնեց «ՌԻԱ Նովոստի» գործակալությունը՝ հղում անելով թուրքական «Հյուրիեթ» թերթին։

Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

«Բանակցությունները սկսվել են հուլիսի 8-ին Բեռնում և ընթացել են մի քանի օր չափազանց գաղտնիության պայմաններում»,- գրում է թերթը՝ կայացած երկխոսությունն անվանելով պատմական։

Բանակցությունների մանրամասները չեն հրապարակվում։ «Հյուրիեթ» թերթի տեղեկատվության համաձայն, թուրքական պատվիրակությունը գլխավորել է ԱԳՆ բարձրաստիճան ներկայացուցիչը։

Թուրքիայի արտգործնախարար Ալի Բաբաջանը, «Հյուրիեթ» թերթի հրապարակումը մեկնաբանելով, չհաստատեց, բայց նաև չհերքեց բանակցությունների մասին տեղեկատվությունը։

«Ժամանակ առ ժամանակ մենք հանդիպում ենք մեր հայ գործընկերների հետ։ Այդ բանակցային երթևեկությունը բավականին կարևոր նշանակություն ունի»,- լրագրողներին ասել է թուրքական դիվանագիտության ղեկավարն Անկարայում։

«Մեր միջև խնդիրներ կան, ինչպես նաև տարբերություններ՝ 1915 թվականի դեպքերի գնահատման մեջ։ Սակայն մենք կարծում ենք, որ երկու երկրների միջև առկա բոլոր խնդիրները պետք է լուծել բանակցությունների միջոցով»,- ավելացրել է Բաբաջանը։

«Հյուրիեթը», Շվեյցարիայի բանակցությունների մասին տեղեկատվություն հրապարակելով, չի բացառում, որ Թուրքիայի նախագահ Աբդուլա Գյուլը վերջին իրադարձությունների լույսի ներքո կարող է սեպտեմբերի 6-ին, Հայաստանի նախագահ Սերժ Սարգսյանի հրավերով, Երևան այցելել՝ ֆուտբոլի 2010թ. աշխարհի առաջնության ընտրական փուլի շրջանակներում երկու երկրների ազգային հավաքականների ֆուտբոլային հանդիպումը դիտելու համար։

Թուրքիան առաջ է քաշում նախապայմաններ՝ երկկողմ հարաբերությունների հաստատման համար. ղարաբաղյան հակամարտության կարգավորում՝ հօգուտ Ադրբեջանի, Հայաստանի կողմից Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարում

Հայաստանում օգոստոսի մեկին կդիտվի արևի մասնակի խավարում. աստղադիտարան

Հայաստանում օգոստոսի մեկին, տեղական ժամանակով 14:45-ից 16:41-ի ընթացքում կդիտվի արևի մասնակի խավարում, հինգշաբթի «Նովոստի-Արմենիա» գործակալությանը հայտնեց ՀՀ Գիտությունների ազգային ակադեմիայի Բյուրականի աստղաֆիզիկական աստղադիտարանի տնօրեն Հայկ Հարությունյանը։

«Հայաստանում մասնակի խավարումը կդիտվի օգոստոսի մեկին, առավելագույն փուլը 23 տոկոս կկազմի, և դա նշանակում է, որ լուսինը կծածկի արևի սկավառակի մեկ քառորդից էլ փոքր հատվածը»,- ասաց Հարությունյանը։

Նա ասաց, որ Հայաստանում խավարումը կսկսվի տեղական ժամանակով 14։45-ին և վերջին կոնտակտը կգրանցվի 16։41-ին, իսկ խավարման առավելագույն փուլը կերևա տեղական ժամանակով 15։45-ին։

«Խավարումը կերևա անզեն աչքով, սակայն դրան նայելն անհնարին կլինի, քանի որ արևի սկավառակի չծածկված մասը կշարունակի լույս ճառագել, ինչի կապակցությամբ խավարմանը խորհուրդ է տրվում նայել կամ շատ մուգ ապակիներով ակնոցով կամ մգացված ապակու միջոցով»,- ասաց Հարությունյանը։

Նա նշեց, որ վերջին անգամ արևի մասնակի խավարման երևույթ Հայաստանում դիտվել է երկու տարի առաջ, երբ երկրում նկատվել է արևի ավելի քան 80 տոկոս խավարում, մինչ այդ 1999թ.-ին երկրում արևի ևս մեկ մասնակի խավարում է եղել։

«Հայաստանում արևի խավարում այնքան էլ հաճախ չի դիտվում՝ մի քանի տարին մեկ անգամ, ընդ որում վերջին 10 տարում նման մասնակի խավարման 3-4 դեպք է եղել»,- ասաց Հարությունյանը։

Նա նշեց, որ խավարումը նորմալ երևույթ է, երբ լուսնի ստվերն ընկնում է երկրի վրա, և տվյալ դեպքում այդ ստվերի մի մասը, որը կիսաստվեր է կոչվում, ընկնում է նաև Հայաստանի վրա։

Նա նաև հայտնեց, որ աստղադիտարանի հեռադիտակները չեն հետևի տվյալ երևույթին, քանի որ դա վտանգավոր է, սակայն խավարումը հնարավոր է լուսանկարել ցանկացած լուսանկարչական ապարատով, բայց միայն շատ մուգ ֆիլտրերի առկայության դեպքում։

«Հաջորդ մասնակի խավարումը կախված կլինի լուսնի և արևի ցիկլից, սակայն այս հարյուրամյակում Հայաստանում լրիվ խավարում այդպես էլ չեն տեսնի»,- ասաց Հարությունյանը

ԶՈՒՐԱԲ ՏՈԴՈՒԱ. ՄԻԹԵ՞ ԲԱՔՎՈՒՄ ԻՆՉ-ՈՐ ՄԵԿԸ ԼՐՋՈՐԵՆ ԿԱՐԾՈՒՄ Է, ՈՐ ՀԱՅԱՍՏԱՆԸ ԿՓՈԽԱՆԱԿԻ ՂԱՐԱԲԱՂԸ ԹՈՒՐՔԻԱՅԻ ՀԵՏ ՍԱՀՄԱՆԸ ԲԱՑԵԼՈՒ ԴԻՄԱՑ

Հայաստանը պատրաստ չէ դադարեցնել Հայոց ցեղասպանության ճանաչմանն ուղղված գործողությունները: Այդ մասին հայտարարել է ռուս փորձագետ Զուրաբ Տոդուան: Նրա կարծիքով, դեռեւս երկար ժամանակ այդ թեման չափազանց ցավոտ կլինի Հայաստանի եւ հայերի համար: «Այդ խնդիրը չափազանց կարեւոր տեղ է զբաղեցնում հայ հասարակության քաղաքական հայացքների համակարգում: Փոխել դա կարճատեւ ժամանակում հնարավոր չէ: Միայն տեւական ժամանակ անց այդ խնդիրը կարող է երկրորդ պլան մղվել, իսկ հեռանկարում՝ անցնել պատմության գիրկը: Եվ դա կարող է տեղի ունենալ հենց այն դեպքում, եթե սկսվի հայ-թուրքական հարաբերությունների կարգավորում: Ինչ վերաբերում է Լեռնային Ղարաբաղին, ապա ակնհայտ է, որ սահմանի բացումն ու տարածքների վերադարձը ոչ համարժեք բաներ են: Տարօրինակ է, որ նման հարցադրում ընդհանրապես գոյություն ունի: Միթե՞Ադրբեջանում ինչ-որ մեկը լրջորեն կարծում է, որ հայ-թուրքական սահմանը բացելու դիմաց Հայաստանը կհամաձայնվի վերադարձնել Լեռնային Ղարաբաղը: Կարծում եմ, խոսք կարող է գնալ միայն Երեւանի դիրքորոշոման որոշ մեղմացման մասին հակամարտության կարգավորման շուրջ բանակցություններում»,-գտնում է փորձագետը: Ըստ Տոդուայի, Լեռնային Ղարաբաղի հարցով առաջին հերթին պետք է զբաղվեն Ադրբեջանի ղեկավարությունն ու հասարակությունը: «Տարօրինակ կլիներ, եթե Անկարան ավելի մտահոգ լիներ այդ հարցով, քան Բաքուն: Պետք է գիտակցել, որ Թուրքիայի արտաքին քաղաքականության մեջ ղարաբաղյան հակամարտությունը չի զբաղեցնում ոչ առաջին, ոչ երկրորդ, ոչ նույնիսկ երրորդ տեղը: Թուրքիայի արտաքին քաղաքականության գլխավոր խնդիրը ԵՄ-ին անդամակցելն է: Դա անհրաժեշտ է երկրի տնտեսական զարգացման համար: Եվրամիությունը կոշտ պայմաններ է առաջադրել: Նա պահանջում է փոխել Թուրքիայի քաղաքականությունը Հյուսիսային Կիպրոսի Թուրքական Հանրապետության հարցում, կարգավորել հարաբերությունները Հայաստանի հետ, երկխոսության գնալ քրդերի հետ: Թուրքիան բարդագույն վիճակում է գտնվում: Նա սատարում է Հյուսիսային Կիպրոսի Թուրքական Հանրապետությանը եւ միեւնույն ժամանակ պայքարում է քուրդ անջատողականների դեմ: Դա շատ ծանր բեռ է: Իրար բացառող սկզբունքների վրա հիմնված քաղաքականություն վարել ի զորու են միայն հարուստ եւ հզոր պետությունները: Թուրքիան այդ պետությունների թվին չի պատկանում: Եվ պետք չէ պահանջել Թուրքիայից ավելին, քան նա ի զորու է անել»,-ընդգծել է Տոդուան, գրում է Day.az-ը:

ՀԱՆՐԱՊԵՏԱԿԱՆ ԿՈՒՍԱԿՑՈՒԹՅՈՒՆԸ ՉԻ ՀԱՆԳՍՏԱՆՈՒՄ
Թվում է, մի քանի ընտրություն կեղծելուց եւ իրենց խոսքով` բացարձակ մեծամասնություն խորհրդարանում եւ նախագահի պաշտոն ձեռք գցելուց հետո Հայաստանի Հանրապետական կուսակցությունը պետք է կանգ առներ, շունչ քաշեր ու մի քիչ մտածեր իր անցած ճանապարհի մասին: Ժամանակներն ակնհայտորեն փոխվել են, նոր մարտահրավերներ են ի հայտ եկել, աշխարհը շատ կոնկրետ պահանջներ ու չափանիշներ է դնում մեր առջեւ, որոնք չկատարելը սպառնում է մեր երկրին միջազգային մեկուսացմամբ` դրանից բխող ողբերգական հետեւանքներով: Հայաստանի իշխանությունն, իր հերթին, ասում է աշխարհին մոտավորապես հետեւյալը` այս մի անգամն էլ ներեք, այլեւս չենք անի: Թվում է, այդ ասածի մեջ ռացիոնալ հատիկ կա. ի վերջո, հասել են իրենց ուզածին, մնում է մարսել, մարսելու համար էլ, թվում է, ընդամենը մի քանի պարզ քայլ է պետք անել: Օրինակ, ավելի ստորին մակարդակներում գոնե մեկ-երկու ընտրություն նորմալ անցկացնել: Եվ դրանով ինչ որ կերպ մեղմել իրավիճակը եւ աշխարհին էլ ցույց տալու բան ունենալ:

Բայց, պարզվում է, ոչ: Հայաստանի իշխանության եւ մասնավորապես Հանրապետական կուսակցության դեպքում վստահ կարելի է ասել` այս կուսակցությունը եթե ընտրություն չկեղծի` կհիվանդանա, իսկ նրա արժանապատվությունը վիրավորված կլինի:

Ինչպես հայտնի է, սեպտեմբերի 7-ին Երեւանի մի քանի համայնքներում տեղի կունենան տեղական ինքնակառավարման մարմինների ընտրություններ: Թվում է, հարմար առիթ էր Հանրապետական կուսակցության համար` անցկացնել քիչ թե շատ նորմալ, ազատ ընտրություններ: Սակայն արդեն իսկ այս կուսակցության սատարմանն արժանացած թեկնածուների ցանկը բավարար է հասկանալու համար, որ ՀՀԿ խնդիր ունի պաշտպանելու իր «ավանդույթներն ու արժանապատվությունը»: Իսկ մասնավորապես Արաբկիր համայնքում այս կուսակցության գործողությունները եւս մեկ անգամ ապացուցում են, որ այն վաղուց դադարել է քաղաքական կազմակերպություն լինելուց: Բանն այն է, որ Արաբկիրի համայնքի ղեկավարի ընտրություններում ՀՀԿ պաշտպանելու է ոչ թե իր տարածքային կառույցի ղեկավար, գործող թաղապետ Հովիկ Շահինյանին, ով առանց ավելորդ աղմուկի եւ ընտրախախտումների կընտրվեր իր պաշտոնին, այլ բիզնեսմեն Ալբերտ Երիցյանին:

Այս վերջինի դեռ չսկսված ընտրարշավի մասին արդեն մամուլը բավական փաստեր է հրապարակել: Պետք է ասել, որ այդ ընտրարշավի մեթոդները նոր չեն մեր քաղաքական համակարգի համար` անձնագրերի հավաքում, ընտրակաշառքներ, եւ այլն: Այլ կերպ Հանրապետական կուսակցության սատարմանն արժանացած թեկնածուն թերեւս պարզապես չի կարող. դա է այսպես ասած «մարդամեջ դուրս գալու» գինը, որ ստիպում է վճարել իշխանությունը, արդյունքում ստանալով օրենքն ամբողջ ծավալով խախտած եւ դրանով իսկ կախման մեջ ընկած ու ամեն ինչի պատրաստ վարչական ռեսուրս, որին կարելի է ցանկացած պահի զոհաբերել: Այլ ճանապարհ մարդկանց պարզապես չի թողնվում: Եւ այս ամբողջ մեխանիզմը տարիներ շարունակ իրականացվում է Հանրապետական կուսակցության միջոցով, որի «քաղաքական տանիքի» տակ են պարբերաբար, ընտրությունից-ընտրություն հավաքվում զանազան մաստերի «ընտրական» խմբավորումները:

ՀԱՅԱՍՏԱՆ-ՎՐԱՍՏԱՆ ԵՐԹԵՎԵԿ
ՀՀ Տրանսպորտի եւ կապի նախարարությունը ուղեւորափոխադրումներ իրականացնող մի շարք ընկերությունների հետ համատեղ վերջին օրերին երթուղային տաքսիներով, միկրոավտոբուսներով եւ ավտոբուսներիով կազմակերպել է Վրաստանից ավելի քան 1600 ուղեւորի տեղափոխումը Հայաստան: Ընդ որում, Բավրայի անցակետից Գյումրի եւ Երեւան ուղեւորների տեղափոխումն իրականացվել է անվճար:

Նշենք, որ օգոստոսի 9-ին 13 երթուղային տաքսիներով Քոբուլետիից Հայաստան է տեղափոխվել 208, իսկ Բավրայից Երեւան 7 Պազ մակնիշի ավտոբոսով`160 ուղեւոր:

Օգոստոսի 10-ին 14 միկրոավտոբուսով Քոբուլետիից տեղափոխվել է 224, իսկ Բավրայից Երեւան 5 ավտոբուսով` 115 ուղեւոր:

Օգոստոսի 11-ին 14 միկրոավտոբուսով Ուրեկիից Հայաստան է տեղափոխվել 224, իսկ Բավրայից` 2 ավտոբուսով եւ 6 միկրոավտոբուսով` 240 ուղուեր:

Օգոստոսի 12-ին 12 միկրոավտոբուսով տեղափոխվել է 192, Բավրայից Երեւան 2 ավտոբուսով 46 եւս այդքանն էլ Բավրայից Գյումրի եւ մեկ միկրոավտոբուսով 16 հոգի:

Օգոտոսի 13-ին 12 միկրոավտոբուսով Քոբուլետիից տեղափոխվել է 192 ուղեւոր, իսկ Բարայից ուղեւոր չի եղել:

Այս պահին նախարարությունը մշտական կապի մեջ է Վրաստանում ՀՀ դեսպանատան եւ Բաթումիում ՀՀ հյուպատոսի հետ եւ անհրաժեշտության դեպքում պատրաստ է տրանսպորտային միջոցներ տրամադրել ուղեւորներին Հայաստան տեղափոխելու համար:

Հարավկովկասյան երկաթուղիներ ընկերության միջոցով օգոստոսի 6-13-ը Երեւան-Թբիլիսի երթուղով ընդհանուր առմամբ մեկնել է 330 եւ վերադարձել 286 ուղեւոր: Երեւան-Բաթումի երթուղով նշված օրերին մեկնել է 446 ուղեւոր եւ վերադարձել 1000 ուղեւոր, տեղեկացնում է Տրանսպորտի եւ կապի նախարարության մամուլի քարտուղարը:
_________________
Արա Բադալյան

«ԼՂ-Ի ԲՆԱԿԻՉՆԵՐԸ ԿԱՐԳԱՎԻՃԱԿԻ ՀԱՐՑԸ ԿԼՈՒԾԵՆ ՀԱՆՐԱՔՎԵՈՎ»
ԱՄՆ պետքարտուղարի օգնականի տեղակալ, ԵԱՀԿ Մինսկի խմբի համանախագահ Բրայզան հայտարարել Է, թե ղարաբաղցիներն իրենք կորոշեն՝ հանրապետությունն անցնելու Է Ադրբեջանի իրավասության ներքո, թե՞ անկախություն Է ստանալու: «Հանրաքվե Է անցկացվելու, եւ դա կորոշեն ղարաբաղցիներն իրենք», ըստ «Ինտերֆաքս»-ի՝ Մոսկվայում լրագրողներին ասել Է Բրայզան՝ ամփոփելով Հայաստանի եւ Ադրբեջանի արտգործնախարարների միջեւ կայացած հանդիպման արդյունքները:

Հայ բնապահպանները Սևանա լճից բաց թողնվող ջրի ավելացումն անթույլատրելի են համարում
18:25 | 19/ 08/ 2008

ԵՐԵՎԱՆ, 19 օգոստոսի. /Նովոստի-Արմենիա/. ՀՀ բնապահպանական հասարակական կազմակերպությունները երեքշաբթի բողոքի ցույց անցկացրեցին ՀՀ ԱԺ շենքի դիմաց՝ բողոքելով Սևանա լճից բաց թողնվող ջրի ծավալները մեծացնելու դեմ։

«Հենց այսօր ՀՀ խորհրդարանը պետք է դիտարկի Սևանա լճից բաց թողնվող ջրի ծավալը 240 մլն խորանարդ մետրից մինչև 360 մլն խորանարդ մետր դարձնելու մասին օրինագիծը։ Նման մտադրությունը լուրջ անհանգստություն է առաջ բերում, իսկ բաց թողնվող ջրի ծավալի նման կտրուկ մեծացումն անթույլատրելի է»,- կարծում է «Թրանսփարենսի Ինթերնեշնլ- Արմենիա» տարածքային զարգացման կենտրոնի փորձագետ Սոնա Այվազյանը։

Փորձագետի խոսքերով, բաղ թողնվող ջրի ծավալների աճ նախատեսող նախագիծը անհրաժեշտ բնապահպանական փորձաքննություն, ինչպես նաև հասարակական քննարկումներ չի անցել։

«Սևանը Հայաստանի ազգային ձեռքբերումն է, և լճի հետ կապված ցանկացած որոշում պետք է քննարկվի ժողովրդի հետ»։

Փորձագետների գնահատականներով, բաց թողնվող ջրի առավելագույն ծավալը, որի դեպքում լիճը պահպանում է ինքնամաքրման հնարավորությունն ու ջրի դրական հավասարակշռությունը, չպետք է գերազանցի 327 մլն խորանարդ մետրը»,- ավելացրեց նա։

Ինչպես կարծում է Այվազյանը, ներկայում կարևորագույն խնդիր է հանդիսանում բոլոր հնարավոր միջոցներով լճի մակարդակի բարձրացումը։

Սևանա լիճը գտնվում է Հայաստանի հյուսիս-արևելյան մասում։ Լճից սկիզբ է առնում միակ աղբյուր գետը՝ Հրազդանը, ընդ որում նրա մեջ թափվում են 28 գետեր, որոնց ավազանների ընդհանուր մակերեսը 2776 խորանարդ մետր է կազմում, այսինքն 80 տոկոս, իսկ միջավազանային տարածքը՝ 699 խորանարդ մետր, այսինքն՝ լճի ընդհանուր ջրահավաք ավազանի մակերեսի 20 տոկոսը։

Սևանա լճի մակարդակը ներկայում 1899,20 մետր է, ինչը 40 սանտիմետրով ավել է 2008 թվականի հունվարի 1-ի ցուցանիշից և 25 սանտիմետրով ավել է անցյալ տարվա նույն ժամանակահատվածի ցուցանիշից, երբ լճի մակարդակը 1898,95 մետր էր։-

ՀԱՅԱՍՏԱՆԸ ԿՄԱՍՆԱԿՑԻ ՇԱՆՀԱՅ ԷՔՍՊՈ-ԻՆ
2010թ. Չինաստանի Ժողովրդական Հանրապետության Շանհայ քաղաքում Բարեկեցիկ քաղաք, բարեկեցիկ կյանք խորագրով Շանհայ էքսպո 2010 համաշխարհային ցուցահանդեսին Հայաստանի Հանրապետության մասնակցությունն ապահովելու նպատակով, կառավարությունը օգոստոսի 21-ի նիստի ընթացքում հանձնարարել է ՀՀ էկոնոմիկայի նախարարին` ապահովել հիշյալ ցուցահանդեսին ՀՀ-ի մասնակցության կազմակերպման ընդհանուր համակարգումը, Զարգացման հայկական գործակալություն ՓԲԸ-ի գլխավոր տնօրենին` ապահովել Շանհայ էքսպո 2010-ին ՀՀ-ի մասնակցության նախապատրաստական եւ կազմակերպչական աշխատանքների իրականացումը եւ ցուցահանդեսին ՀՀ-ի մասնակցությունը, ինչպես նաեւ 10-օրյա ժամկետում նախապատրաստել եւ ՀՀ էկոնոմիկայի նախարարին ներկայացնել ցուցահանդեսին ՀՀ-ի մասնակցության միջոցառումների ծրագիրը, սցենարը եւ ժամանակացույցը: Այդ մասին տեղեկացնում է կառավարության մամուլի ծառայությունը:

ՀԱՅԱՍՏԱՆԻ ԽՈՐՀՐԴԱՐԱՆԻ ՀԵՐԹԱԿԱՆ ՀԱԿԱԺՈՂՈՎՐԴԱԿԱՆ ՔԱՅԼԸ

Այսօր Հայաստանի խորհրդարանը 80 կողմ եւ 4 դեմ ձայներով առաջին ընթերցմամբ ընդունել է կառավարության առաջարկած օրինագիծը, որով Սեվանա լճից բաց է թողնվելու 360 մլն խմ ջուր:
_________________
Արա Բադալյան