Հայաստանի նորություններ

1.5 ՄԼՆ ԾԱՂԻԿ 1.5 ՄԼՆ ԶՈՀԵՐԻ ՀԻՇԱՏԱԿԻՆ
[12:11] 24 Ապրիլի, 2008

1915 թվականի ապրիլյան այս օրը դարձավ հայ ժողովրդի եւ ընդանրապես 20-րդ դարի մարդկության ամենաողբերգական էջերից մեկը: Արեւմտյան Հայաստանում ապրող 1,5 մլն հայեր զոհ գնացին օսմանյան կայսրության հայակործան ծրագրին. մոտ 800 հազար հայերի հաջողվեց փրկվել` գաղթելով ու ապաստան գտնելով Արեւելյան Հայաստանում եւ աշխարհի տարբեր անկյուններում:

Հայկական սփյուռքը 20-րդ դարասկզբի ոճրագործության անջնջելի ապացույցն է, ինչն այդպես էլ թուրքական իշխանության իրավահաջորդները չեն ուզում ճանաչել ու դատապարտել: Այսօր ստեղծվել է բացառիկ մի պահ, երբ հայ ժողովրդի պատմական արդարության հաստատման շահը որոշ առումով համընկնում է նաեւ քաղաքակիրթ աշխարհի շահերի հետ. Թուրքիայի` ԵՄ-ին անդամագրվելու հարցում աշխարհի տարբեր երկրների ղեկավարներ կարեւորում են հանցագործության ընդունումն ու ճանաչումը Թուրքիայի կողմից: Մարդկության դեմ ուղղված այդ հանցագործությունը առ այսօր միջազգային հանրությունը դեռեւս չի դատապարտել, եւ իր գնահատականը չի տվել, թեեւ այդ ճանապարհին իրենց ճշմարիտ խոսքն են ասել Ռուսաստանը, Ֆրանսիան, Եվրախորհուրդը, եվրոպական մի շարք երկրներ, ԱՄՆ մի քանի նահանգներ... Հայոց ցեղասպանության միջազգային ճանաչմանն ուղղված աշխատանքները սկիզբ առան 1965թ. ապրիլի 24-ից:

Ինչպես ամեն տարի, այսօր էլ` 2008 թվականի ապրիլի 24-ին, հազարավոր քաղաքացիներ իրենց հարգանքի տուրքը մատուցեցին 1915 թ. ցեղասպանության զոհերի հիշատակին` այցելելով հուշարձանի մոտ: Այսօր, ինչպես ամեն տարի 1,5 մլն ծաղիկ կդրվի անմեղ զոհերի հիշատակը հավերժացնող անմար կրակի առջեւ: Նույնքան աղոթք կբարձրանա երկինք: Նույնքան մոմ կվառվի անմեղ նահատակների հոգիների համար: Եվ այսօր եղեռնից վերապրած մեր հայրենիակիցները սրտի կսկիծով, անմոռանալի վշտով ու խոր ատելությամբ կհիշեն 1915 թվականի գարունը:

ՍԵՐԵՆԱԴԱ ՏԻԳՐԱՆ ԹՈՐՈՍՅԱՆԻ ՊԱՏՈՒՀԱՆԻ ՏԱԿ
[21:49] 23 Ապրիլի, 2008

Աժ նախագահ Տիգրան Թորոսյանի ընտանիքի անդամներն այսօր արթնացել են իրենց պատուհանի տակ հնչող ՚սերենադայիցՙ:

՚Հիմաՙ երիտասարդական ֆորումի անդամներն այսօր առավոտյան Մաշտոցի պողոտայի վրա գտնվող Տիգրան Թորոսյանի պատուհանի տակ երգել են իրենց իսկ ստեղծագործությունը: Երգի բառերը հետեւյալն են. ՚Ազատ, անկախ Հայաստան: Ցույց, միտինգ, երթ, պիկետ, զբոսանք: Ազատություն...ՙ:

Իսկ ինչու է երգն առաջին անգամ հնչել հենց Տիգրան Թորոսյանի պատուհանի տակ. հարցին`՚Հիմաՙ-ի անդամները Ա1+ին բացատրեցին. ՚Առաջինն այդ պատվին արժանացրեցինք Տիգրան Թորոսյանին, քանի որ նա որպես ԱԺ նախագահ իր ակտիվ մասնակցություն է ունեցել ՚Ժողովներ, հանրահավաքներ, երթեր եւ ցույցեր անցկացնելու մասինՙ օրենքի փոփոխությանը, որը սահմանփակել է մեր ազատությունը: Այս երգով մենք պատրաստվում ենք արթնացնել նաեւ մի շարք այլ պատգամավորների եւ իշխանավորների, որոնք սահմանափակում են մեր ազատություններն ու ոտնահարում մեր իրավունքներըՙ: ՚Հիմաՙ-ի անդամները հայտնեցին, որ բացի երգերից իրենց իրավունքները ոտնահարողների համար մի շարք անակնկալներ են պատրաստել, որոնք շատ շուտով կմատուցեն:

Ի դեպ, ակցիայի մասնակիցները հայտնեցին, որ երգը, կարծես թե արժանացել է Թորոսյանների ընտանիքի հավանությանը, քանի որ իրենց վարագույրի հետեւից լսողներ են եղել:

ԱՊՐԻԼԻ 24-Ը ՈՒՐԻ՛Շ ՕՐ Է
Տարիներ առաջ մեր թերթի էջերում հենց Թուրքիայի հետ հարաբերությունների հարցով բանավիճում էին մեր տաղանդավոր արձակագիր Պերճ Զեյթունցյանը եւ ՀՀ առաջին նախագահի անվտանգության հարցերով գլխավոր խորհրդական Ժիրայր Լիպարիտյանը: Վերջինիս հեգնախառն մի հոդվածին ի պատասխան Պ. Զեյթունցյանը մոտավորապես հետեւյալը գրեց «Ազգում». «Ես հայի հետ չեմ կարող բանավիճել, ինձ այլազգի ընդդիմախոս տվեք»: Հայը հային չի կարող ընդդիմախոս լինել Ցեղասպանության հարցում, Թուրքիա կոչվող պետություն-ժողովրդի գործած Ոճրի հարցում:

Ու թվում է, որ, իսկապես, կարիք չկա որեւէ հայի բացատրել, առավել եւս բանավիճել, թե այսօր ինչ օր է, ինչ է նշանակում Ապրիլի 24-ը, ինչ խորհուրդ ունի այդ օրը, ինչ է զգում յուրաքանչյուր հայորդի աշխարհի որեւէ մասում ու հատվածում: Կարիք չկա նաեւ որեւէ հայի բացատրելու Հայաստանում, Արցախում թե սփյուռքի հեռու ու մոտիկ տարածքներում, թե այդ օրը Մեծ եղեռնի զոհերի որեւէ հուշարձան այցելելը, հայկական որեւէ եկեղեցում պատարագի ներկա գտնվելը, որեւէ միջոցառման մասնակցելը, նույնիսկ տասը րոպե իր տանը կամ աշխատանքի վայրում լուռ խոկալն ինչ իմաստ ունի, ում դեմ է նրա բողոքը, ինչպիսի արդարություն է պահանջում մարդկությունից, որի դեմ էր նաեւ ուղղված Մեծ եղեռնը:

Սակայն թվում է, որ մեր մեջ չհասկացող մարդկանց մի խումբ կա, որի հետ իսկապես դժվար է բանավիճել, քանզի... հայ են: Այդ ատելավառ մարդկանց խումբը, որն իրեն կոչում է «Համաժողովրդական շարժման կենտրոն», այսօր, Ապրիլի 24-ին, փորձելու է, ըստ իր տարածած հայտարարության, Ազատության հրապարակից սկիզբ առնող երթով նոր իմաստ եւ «այլ խորհուրդ» ներարկել «Ցեղասպանության անմեղ զոհերի հիշատակի օր»վան, եւ խոստանում է, որ «ապրիլի 24-ը կրկին դառնալու է մեր չդադարած պայքարի նոր մի սկիզբ», որն ավարտվելու է Ազատության ձեռքբերմամբ» (բառի գլխագրումը խմբագրությանը չէ): Չենք հարցնում՝ ազատություն ումի՞ց, քանի որ նույն հայտարարության քիչ վերեւում վերամբարձ ոճով մատնանշված է հասցեն՝ վարչախմբի՛ց, որը, իբր, փորձ է արել 2008 թ. մարտի 1-ին ջարդելու իբր «մարդկային ազատության, արժանապատվության եւ արդարության համար Հայաստանի քաղաքացիների համաժողովրդական նոր Շարժումը»: Գրում ենք «իբր», քանի որ հայտարարության սկզբում, հիշեցնելով 1988-ի Ապրիլի 24-ի երթը, հայտարարությունը վերհիշեցնում է իր իսկական, բո՛ւն նպատակը՝ «Շարժման փաստական իշխանության հաստատման համար»: Ուրեմն, Ապրիլի 24-ը ծառայեցվելու է Շարժման (սա մեզ ծանոթ ՀՀՇ-ն չէ՞) իշխանության հասնելու նպատակին:

Իրեն հայ զգացող յուրաքանչյուր մարդ գոնե այսօր, Ապրիլի 24-ին, անշուշտ, պիտի հարց տա՝ իշխանության հասնելու ուրիշ օր չգտա՞ք, ինչո՞ւ եք փորձում իշխանատենչական պայքարի վերածել մեր Սգո երթը, մեզնից խլված հայրենիքի Կարոտը, մեր Ցասումը մարդու անմարդկայնության դեմ, ազգային իրավունքներին տեր մնալու մեր Վճռականությունը:

Ժողովրդի անունից խոսելուց առաջ հարցրի՞ք իմ եւ ինձ նմանների կարծիքը: Ապրիլի 24-ը այդ օրը չէ՛...

Հայաստանում շրջվել է մի երթուղային տաքսի, յոթ մարդ վիրավորվել է

ԵՐԵՎԱՆ, 28 ապրիլի./Նովոստի-Արմենիա/. Շաբաթ օրը Երևան-Գյումրի ավտոճանապարհի 83-րդ կմ-ում տեղի է ունեցել ճանապարհատրանսպորտային պատահար, որի հետևանքով տուժել է յոթ մարդ:

Ինչպես երկուշաբթի «Նովոստի-Արմենիային» հաղորդեցին Հայաստանի փրկարար ծառայությունից, 26-ամյա Հովսեփ Չիվաշյանին պատկանող «ԳԱԶԵԼ» մակնիշի ավտոմեքենան դուրս է եկել ճանապարհի երթևեկելի մասից և շրջվել:

Չիվաշյանը և ավտոմեքենայում գտնվող 10 ուղևորներից 6-ը տարբեր աստիճանի մարմնական վնասվածքներ են ստացել։

Հաղորդագրությունում ասվում է, որ տուժածները տեղափոխվել են Գյումրիի Գյուլբենկյանի անվան հիվանդանոց: Բոլոր տուժածները, ստանալով առաջին բուժօգնություն, դուրս են գրվել հիվանդանոցից

ՀՀ նախագահի պաշտոնում Սարգսյանի ընտրվելը մեծացրել է իշխող Հանրապետական կուսակցության պատասխանատվությունը. խոսնակ

ԵՐԵՎԱՆ, 28 ապրիլի. /Նովոստի-Արմենիա/. ՀՀ նախագահի պաշտոնում հանրապետական կուսակցության նախագահ Սերժ Սարգսյանի ընտրվելը կուսակցության վրա մեծ պատասխանատվություն է դրել, կարծում է ԱԺ խորհրդարանի խոսնակ, ՀՀԿ փոխնախագահ Տիգրան Թորոսյանը։

«Հայաստանի նախագահական ընտրություններից հետո Հանրապետական կուսակցությունը ոչինչ չկորցրեց, հակառակը, ձեռք բերեց էլ ավելի մեծ պատասխանատվություն՝ ի դեմս նախագահ Սերժ Սարգսյանի», - ասաց նա երկուշաբթի տեղի ունեցած մամուլի ասուլիսի ժամանակ։

Փետրվարի 19-ին Հայաստանում տեղի ունեցած նախագահական ընտրություններին ընտրողների ձայների 52,82 տոկոսով հաղթանակ տարավ վարչապետ Սերժ Սարգսյանը։

Թորոսյանի խոսքերով, ՀՀ նախագահի պաշտոնում Սարգսյանի ընտրվելուց հետո էլ ավելի մեծացավ կառավարության ծրագրերի և ՀՀԿ ու նախագահ Սարգսյանի նախընտրական ծրագրերի իրականացման համար պատասխանատվությունը։

ՀՀԿ-ն գրանցվել է 1991-ին։ 1990-97թթ. այն ղեկավարել է Աշոտ Նավասարդյանը։ 2000-2007թթ. կուսակցության վարչության նախագահ է դարձել կառավարության նախկին ղեկավար Անդրանիկ Մարգարյանը։ Մարգարյանի մահվանից հետո 2007թ.-ին ՀՀԿ-ն ղեկավարեց Սերժ Սարգսյանը։

ՀՀ չորրորդ գումարման խորհրդարանում ՀՀԿ-ն ստացել է 65 մանդատ։ Երկրի նոր կառավարությունում, որի ձևավորումն ավարտվել է ապրիլի 21-ին, նույն կուսակցությանն է պատկանում երեք նախարարական պորտֆել

ԱՐԵՎՄՈՒՏՔԸ ԼՐՋՈՐԵՆ Է ԶԲԱՂՎՈՒՄ ԱԴՐԲԵՋԱՆՈՎ

Մայիսի 1-ին Ադրբեջանում ԱՄՆ դեսպան Էնն Դերսին, անդրադառնալով հոկտեմբերի 15-ին մեր հարեւան երկրում կայանալիք նախագահական ընտրություններին, ուղղակի անլուծելի խնդիրներ առաջադրեց ադրբեջանական իշխանություններին

Նրա կարծիքով, Ադրբեջանի կառավարության եւ քաղաքացիական հասարակության հետ իրենց առաջիկա համագործակցությունն ուղղված է լինելու այդ երկրի պատմության մեջ «առաջին անգամ ազատ եւ արդար ընտրությունների անցկացմանը»։ Հասկանալի է, որ Ադրբեջանի ու նրա իշխանությունների առջեւ նման անհասանելի նշաձող տեղադրելու միջոցով Միացյալ Նահանգները փորձում է լուծել բոլորովին այլ խնդիրներ։

Միացյալ Նահանգների նպատակների մասին նախնական պատկերացում կազմելու համար բավական է միայն ծանոթանալ այն կազմակերպությունների ցանկին, որոնք առաջիկայում 3 միլիոն դոլար են ստանալու ԱՄՆ կառավարությունից ադրբեջանական ընտրություններին աջակցելու, այսինքն՝ բողոքները քննելու, ձայների զուգահեռ հաշվարկ իրականացնելու, նախընտրական դեբատներ կազմակերպելու, իրավապահ մարմինների մարզումներ անցկացնելու եւ այլ նպատակներով։ Դրանք են՝ ԱՄՆ Ազգային դեմոկրատական ինստիտուտը, Հանրապետականների միջազգային ինստիտուտը, Ընտրական համակարգերի միջազգային ֆոնդը, Ամերիկյան իրավաբանական ասոցիացիան, Հետազոտությունների ու փոխանակման միջազգային խորհուրդը, այն է՝ «գունավոր հեղափոխությունների» կազմակերպման գործի մեջ հմտացած ամերիկյան կառույցների գրեթե ողջ «տեսականին»։

Միաժամանակ ԱՄՆ պետքարտուղարության մանր գրանտների գծով հանձնաժողովը սկսելու է նաեւ Ադրբեջանի ոչ կառավարական կազմակերպությունների եւ հասարակական խմբերի ֆինանսավորումը։

Նախքան այս բավականաչափ խոսուն ծրագրի հրապարակումը, Ադրբեջանով սկսել էր «զբաղվել» նաեւ ոչ անհայտ «Ագո»-ի խումբը, որը ապրիլի 22-ի իր հաշվետվության մեջ կարեւոր է համարել Ադրբեջանի ընտրական օրենսգրքի փոփոխությունը եւ ընդգծել Վենետիկի հանձնաժողովի մասնակցությամբ «Հանրահավաքների ազատության մասին» օրենքի փոփոխված տարբերակն ընդունելու կարեւորությունը։ Առաջ է քաշվել նաեւ Հեռուստատեսության եւ ռադիոյի ազգային խորհրդի անկախության ապահովման առաջադրանքը։

Ստացվում է, որ այն բոլոր ամերիկյան ու եվրոպական կառույցները, որոնք անցած ձմռանը տեղի ունեցած նախագահական ընտրությունների ժամանակ զբաղվում էին նախ՝ Վրաստանով, եւ ապա՝ ավելի մեծ թափով Հայաստանով, այժմ իրենց «դեսանտներն» ուղղում են դեպի Ադրբեջան։

Պետք է ասել, որ Ադրբեջանի կառավարող վերնախավը լրջորեն անհանգստացած է հոկտեմբերի 15-ի նախագահական ընտրություններից առաջ արեւմտյան կառույցների ձեռնարկած քայլերից եւ փորձում է դիմադրել ժողովրդավարական ընտրությունների կազմակերպմանն ուղղված նրանց առաջարկներին, զեկույցներին ու խորհուրդներին։ Միաժամանակ փորձ է արվում տպավորություն ստեղծել, թե իբր Ադրբեջանում գոյություն չունեն նախագահական ընտրություններից հետո Վրաստանում ու Հայաստանում տեղի ունեցած իրադարձությունների կրկնության ո՛չ օբյեկտիվ, ո՛չ էլ սուբյեկտիվ նախադրյալներ։

Ակնհայտ է, սակայն, որ չնայած նախագահ Իլհամ Ալիեւի եւ նրա վարչակազմի կողմից շարունակաբար ռեկլամվող Ադրբեջանի կայունության ու տնտեսական ակնառու հաջողությունների գաղափարին, այս երկրում գոյություն ունեցող պրոբլեմները որոշ հարցերում նույնիսկ ավելի սուր են, քան Վրաստանում, կամ Հայաստանում։ Մասնավորապես Ադրբեջանում ակնառու եւ ցայտուն է դրսեւորվում Բաքվի ու մարզերի զարգացման անհամապատասխանությունը։ Իսկ սոցիալական տարբեր խմբերի եկամուտների աճի տեմպերի միջեւ ճեղքվածքը ավելի մեծ է, քան նավթի ու գազի պաշարներից զուրկ Հարավային Կովկասի մյուս երկրներում։

Ի տարբերություն Հայաստանի, գոյություն ունի նաեւ ընդգծված դժգոհություն՝ Ղարաբաղի հարցով անցած տարիներին իրականացված քաղաքականության հանդեպ, որը «խաղարկելու» համար նախագահական ընտրապայքարի մեջ ներգրավված կողմերն առաջիկայում հանդես են գալու մեկը մյուսից ավելի արմատական հայտարարություններով։

Դրանով հանդերձ, դեռեւս մինչեւ վերջ պարզ չեն Ադրբեջանում Միացյալ Նահանգների ու միջազգային կառույցների առայժմ ինչ-որ առումով՝ ցուցադրական բնույթ ունեցող ակտիվացման բոլոր խորքային շարժառիթները։ Ակնհայտ է միայն, որ այստեղ եւս ծավալվելու է երկակի խաղ։ ԱՄՆ-ը փորձելու է մի կողմից` ակտիվացնել ընդդիմությանը, հաղթանակի հույսեր արթնացնել, մյուս կողմից էլ «աշխատելու է» նախագահ Ի.Ալիեւի հետ՝ նրանից կորզելու աշխարհաքաղաքական բնույթի զիջումներ։

Կարծում ենք, որ մինչեւ հոկտեմբերի 15-ը Միացյալ Նահանգները, նրա հովանու ներքո գործող միջազգային կառույցները եւ Եվրամիության երկրները Ադրբեջանում նույնպես ամեն ինչ անելու են Վրաստանի ու Հայաստանի վերջին իրադարձություններից ակնհայտ դարձող «թույլ իշխանություն-ուժեղ արտաքին խաղացողներ» բանաձեւի կիրարկման նպատակով։ Խնդիրը այն է, թե կհաջողվի՞ Ադրբեջանի ընդդիմությանը օգտագործել այդ ամենը երկրում սեփական դիրքերի ամրապնդման համար։

Բոլոր դեպքերում Ադրբեջանին սպասող ընտրական թոհուբոհը մեր երկրի ու ժողովրդի համար խոստանում է դառնալ կարճատեւ, բայց խիստ անհրաժեշտ ժամանակաշրջան՝ ներքին համախմբվածության վերականգնման ու Հայաստանի արտաքին քաղաքականության ակտիվացման համար։

ՎԱՐԴԱՆ ԳՐԻԳՈՐՅԱՆ

ՄՐՑԱՆԱԿԸ ԼԵՎՈՆ ԲԱՐՍԵՂՅԱՆԻՆ

Մայիսի 3-ին, Երեւանում, մամուլի ոլորտի խնդիրներով, խոսքի ազատության պաշտպանության հարցերով զբաղվող չորս կազմակերպություններ` Երեւանի մամուլի ակումբը, Ժուռնալիստների միությունը, Ինտերնյուս կազմակերպությունը եւ Խոսքի ազատության պաշտպանության կոմիտեն նշել են մամուլի ազատության համաշխարհային օրը եւ այդ կապակցությամբ հանձնել ամենամյա մրցանակ, որը հանձնվում է արդեն երրորդ տարին եւ կոչվում է "Մամուլի ազատության ժամանակը": Մրցանակը տրվում է հրապարակումների կամ մամուլի ազատության պաշտպանության գործում ծավալած գործունեության համար:

Մրցանակի առաջին կրողները եղել են Արամ Աբրահամյանն ու Տիգրան Պասկեւիչյանը: 2008 թվականի մրցանակակիրը ակտիվ լրագրության ոլորտից չէ, սակայն ակտիվորեն զբաղվում է խոսքի ազատության պաշտպանության հարցերով: "Մամուլի ազատության ժամանակը" ամենամյա մրցանակը 2008 թվականին շնորհվել է Գյումրիի լրագրողների "Ասպարեզ" ակումբի նախագահ Լեւոն Բարսեղյանին, ով վերջին տարիներին աչքի է ընկել մամուլի ազատության համար իր ակտիվ եւ հետեւողական գործունեությամբ, հատկապես վերջին ամիսներին, երբ Լեւոն Բարսեղյանը զբաղվում էր Գյումրիի Գալա հեռուստաընկերության խնդրով, եւ այդ առումով, չնայած Գալայի դեմ հետեւողական վարչական ճնշումների, հասնելով նկատելի հաջողությունների:

Լեւոն Բարսեղյանը շնորհակալություն է հայտնել մրցանակի համար, ասելով, որ այն իր համար անակնկալ էր, քանի որ ինքը միշտ համարել է, որ անում է այն, ինչ բխում է իր տեսակից, իր էությունից:

ՆՈՐ ԺԱՄԱՆԱԿՆԵՐ ԿՈՒՍԱԿՑՈՒԹՅԱՆ
ՆԱԽԱԳԱՀ ԱՐԱՄ ԿԱՐԱՊԵՏՅԱՆԻ ՈՒՂԵՐՁԸ ՀԱՅԱՍՏԱՆԻ ՔԱՂԱՔԱՑԻՆԵՐԻՆ

Ընթերցվել է Համաժողովրդական շարժման երկրորդ կոնգրեսում ՆԺԿ վարչության անդամ Հրաչյա Սարգսյանի կողմից

Սիրելի Ժողովուրդ

2008 թվի փետրվարի 19-ին Քո ձայնը հերթական անգամ կեղծվեց:

Մինչև կոկորդը կոռուպցիայի և կրիմինալի մեջ թաթախված վարչախումբը հետընտրական համաժողովրդական բողոքի օրեցօր ուժգնացող ալիքից սարսափած, խաղաղ ցուցարարների դեմ օգտագործեց զինուժ: Մեր նորագույն պատմության մեջ մարտի 1-ը կմնա և որպես արյունոտ շաբաթ և որպես ժողովրդի անկոտրում կամքի դրսևորման օր:

Վարչախումբը պարտություն է կրում թե ուժային, թե քաղաքական և թե բարոյական դաշտում: Եվ դա իրողություն դարձավ, որովհետև Դու չվախեցար, չհուսահատվեցիր և չայլասերվեցիր:

Հայ ժողովրդի խոհուն իմաստնությունը և հոգու վեհությունը մնացին իրենց բարձունքում:

Եվ արդ, Մենք պետք է շարունակենք Մեր համառ, աննահանջ պայքարը:

Ժողովրդի հետ են երկրի ամենաարմատական ընդդիմադիր քաղաքական ուժերը, անկաշառ մտավորականները, միջազգային հասարակական կարծիքը: Նախագահական ընտրություններով ձեւավորված շարժման համաժողովրդական էությունը աքսիոմատիկ ճշմարտություն է: Այդ շարժմանն են միացել գաղափարապես, քաղաքական մոտեցումներով, էությամբ իրարից տարբերվող ուժեր: Շարժման մեջ ակտիվ մասնակցում են հասարակության բոլոր շերտերը և հատվածները: Հասարակությունը ձերբազատվել է վախի զգացումից և նրա նպատակը մեկն է` հեռացնել իշխող վարչախմբին, երկրի ճակատագիրը վստահել բարեկիրթ, ազգանվեր և բանիմաց գործիչներին: Եվ այսօր մեր ժողովուրդն ավելի քան երբևէ միասնական է: Եվ նա համոզված իր հաղթանկի մեջ:

Ես ողջունում եմ հասարակության լավատեսական տրամադրությունները և համոզված եմ, որ մեր հայրենիքի հետագա առաջընթացը հնարավոր է իրականացնել բացառապես արդարության հիմքի վրա ձևավորված ժողովրդաիշխանության միջոցով:

ՀԱՄԱԺՈՂՈՎՐԴԱԿԱՆ ՇԱՐԺՈՒՄԸ ՎԵՐԱԿԱԶՄԱՎՈՐԵԼՈՒ ԱՌԱՋԱՐԿ

Մայիսի 2-ին, կառավարության նիստերի դահլիճում տեղի է ունեցել Լեւոն Տեր-Պետրոսյանի գլխավորած համաժողովրդական շարժման երկրորդ հանրապետական կոնգրեսը: Կոնգրեսն իր աշխատանքը պետք է սկսեր ժամը 12-ին, սակայն դեռ դրանից մեկ ժամ առաջ կառավարության նիստերի դահլիճի մուտքը բազմամարդ էր, իսկ դահլիճն էլ արդեն գրեթե լեցուն: Ժամը 12-ից 10-15 րոպե պակաս արդեն գրեթե անհնար էր անցնել մուտքի բազմության միջով: Նույնիսկ Լեւոն Տեր-Պետրոսյանի համար բացվեց ընդամենը մի փոքր միջանցք, որ նա կարողանա մուտք գործել շենք, ինչը սակայն տեղի ունեցավ հավաքված բազմության ծափահարությունների եւ “Լեւոն” վանկարկումների ներքո:

Դահլիճում ինչքան մարդ կար նստած, գրեթե նույնքանն էլ ոտքի վրա էին: Լիքն էր նաեւ նախասրահը, ուր տեղադրված մոնիտորի միջոցով կոնգրեսի աշխատանքին հետեւում էին դահլիճից դուրս մնացածները: Համաժողովրդական շարժման երկրորդ կոնգրեսն աշխատանքը սկսեց մեկ րոպե լռությամբ հարգելով մարտի 1-ի զոհերի հիշատակը: Կոնգրեսի պատվիրակների առաջ ելույթ ունեցան համաժողովրդական շարժման քաղաքական առաջնորդները` Ստեփան Դեմիրճյանը, Արամ Զավենի Սարգսյանը, ՆԺԿ վարչության անդամ Հրաչյա Սարգսյանը, ով ընթերցեց ձերբակալության մեջ գտնվող Արամ Կարապետյանի ողջույնի ուղերձը, ուր հնչում էր վերջնական հաղթանակի համոզվածությունը: Ի դեպ, Կոնգրեսին ներկա էր նաեւ Արամ Կարապետյանի կինը: Ներկա էին նաեւ մյուս քաղբանտարկյալների կանայք, որոնց անունից հանդես եկավ նրանց շարժումը համակարգող Մելիսիա Բրաունը` նախկին արտգործնախարար, քաղբանտարկյալ Ալեքսանդր Արզումանյանի կինը:

Ելույթ ունեցավ նաեւ ռեժիսոր Տիգրան Խզմալյանը, ով հայտարարեց, թե ձայն չի տվել Լեւոն Տեր-Պետրոսյանին, բայց ուրախ է հրավերի համար, քանի որ Հայաստանում պետք է լինի այլախոհության ամբիոն:

Երկարատեւ լռությունից հետո ելույթ ունեցավ նաեւ մարքսիստ Դավիթ Հակոբյանը, որի ելույթը բավական աշխուժությամբ ընդունեց դահլիճը: Մարքսիստը հայտարարեց, որ պետք է հասնել պառլամենտը ցրելուն եւ նոր պառլամենտի ընտրության: Պառլամենտի գրավումը համաժողովրդական շարժման համար նման է Բաստիլի գրավման, հայտարարեց մարքսիստը եւ նաեւ նշեց, որ Սերժ Սարգսյանն այլ ռեսուրս չունի, քան ցրել պառլամենտը, եւ եթե չանի դա, ապա արքայական գամբիտը պատրաստ է:

Բոլոր ելույթ ունեցողները խոսում էին հաղթանակի անխուսափելիության, շարժման անկոտրում ընթացքի, քաղբանտարկյալների ազատության, նրանց աննկուն ոգու, նրանց զորակից լինելու մասին: Ելույթներն ընդհատվում էին դահլիճի բուռն ծափահարություններով եւ վանկարկումներով` “Լեւոն, Լեւոն” “Ազատ, անկախ Հայաստան”, “Հիմա, հիմա”, “Նիկոլ, Նիկոլ”, եւ այլն:

Վանկարկումներն ու ծափահարություններն էլ ավելի ուժգնացան, երբ հայտարարվեց Լեւոն Տեր-Պետրոսյանի ելույթի մասին:

Առաջին նախագահը խոսեց շարժման հետագա անելիքների վերաբերյալ: Նա առաջարկեց, որ շարժումը, որը նախագահի ընտրությունից առաջ ձեւավորվեց որպես նախընտրական դաշինք, այժմ նոր բովանդակություն ու ձեւ ստանա: Լեւոն Տեր-Պետրոսյանն առաջարկում է, որ համաժողովրդավարական շարժումը վերանվանվի Ազգային Կոնգրես եւ վերակազմավորվի: Նա նշել է, թե դա ընդամենը առաջարկ է, որը պետք է քննարկեն շարժմանն անդամակցող քաղաքական ուժերը: Նա նշել է, թե քաղաքական ուժերը, որոնք կանդամակցեն Կոնգրեսին, պահպանում են իրենց ինքնուրույնությունը, կառուցվածքը եւ նաեւ քաղաքական ինքնուրույն գործունեության հնարավորությունը: Սակայն առաջին նախագահը նաեւ չի բացառել, որ հետագայում շարժումը վերաճի մեկ, կենտրոնացված քաղաքական միավորի:

Լեւոն Տեր-Պետրոսյանը խոսել է նաեւ քաղաքական երկխոսության մասին, ինչպես նաեւ անդրադարձել հասարակության երկպառակության մասին գնահատականներին: Նա ասել է, որ թեեւ ներկայիս նախագահն ու իշխանությունը ձեւավորվել են ապօրինաբար, բայց իրենք չեն անտեսում նրանց գործոնը եւ պատրաստ են երկխոսության, սակայն դրա համար անհրաժեշտ է, որ իշխանությունը կատարի ԵԽԽՎ ապրիլի 18-ի բանաձեւի պահանջները եւ առաջին հերթին ազատ արձակի իրենց բանտված ընկերներին, հայտարարել է Լեւոն Տեր-Պետրոսյանը: Նրա խոսքով, այդ մարդիկ քաղբանտարկյալ էլ չեն, այլ պատանդ, որոնց դիմաց իշխանությունն ընդդիմությունից փրկագին է ուզում: Սակայն Տեր-Պետրոսյանն ասել է, թե իշխանությունը թող հույս չունենա, որ բանտելով իրենց ընկերներին, կարող է ծնկի բերել շարժումը: Փետրվարի վերջին տասնօրյակում ազատռության շունչն առած քաղաքացիների Շարժումը անկասելի է, հայտարարել է Լեւոն Տեր-Պետրոսյանը, ասելով, թե ընկերների դիմաց էլ իշխանությունը թող չսպասի որեւէ փրկագին, քանի որ դա իշխանության համար շատ կլինի, իշխանութունն արժանի չէ դրան:

Ինչ վերաբերում է հասարակական երկպառակության մասին գնահատականներին, ապա Լեւոն Տեր-Պետրոսյանը դա չի ընդունում, ասելով, թե չկա հասարակության մեջ երկպառակություն, այլ կա հասարակության եւ իշխանության մեջ հակասություն: Այդ հակասությունը լուծելու միակ ճանապարհ Լեւոն Տեր-Պետրոսյանը համարում է նախագահի եւ խորհրդարանի արտահերթ ընտրությունը:
_________________
Երբ որ նշան են բռնել թիկունքիդ, քո զգաստությունն էլ իմաստ չունի...

ԱՐԴՅՈՔ ՄԱՐՏԻ 1-Ը ՍԱԴՐԵԼ Է ԵՎՐՈՊԱՆ

Հայաստանի նախագահի ընտրությանը տված գնահատականի եւ ընդհանրապես, Հայաստանի վերջին ներքաղաքական զարգացումների հանդեպ միջազգային հանրության կեցվածքի մասին իր քննադատական տեսակետն է հայտնել Հայաստանի առաջին նախագահ Լեւոն Տեր-Պետրոսյանը, ով մայիսի 2-ին հանդես է եկել իր գլխավորած համաժողովրդական շարժման Կոնգրեսի առաջ: Լեւոն Տեր-Պետրոսյանը նշել է, թե հատկապես ուզում է անդրադառնալ եվրոպական կառույցների կեցվածքին ու գործողություններին, քանի որ դրանց անդամ է Հայաստանը եւ ինչպես մեր երկիրը նրանց, այդպես էլ նրանք մեր երկրի հանդեպ ունեն պարտավորություններ, որոնք սակայն չկատարեցին:

Լեւոն Տեր-Պետրոսյանը հայտարարել է, որ ԵԱՀԿ/ԺՀՄԻԳ դիտորդական առաքելությունը, առերեւույթ խիստ, բայց ըստ էության ոչինչ չասող իր եզրակացությամբ լեգիտիմացրել է խայտառակ մակարդակի եւ համատարած ընտրակեղծիքների պայմաններում անցկացրած նախագահի ընտրությունը: Լեւոն Տեր-Պետրոսյանը հատկապես կարեւոր է համարել այն արտահայտությունը, ըստ որի, ԵԱՀԿ/ԺՀՄԻԳ դիտորդները արձանագրել են, որ Հայաստանի նախագահի ընտրությունն ընդհանուր առմամբ համապատասխանել է ԵԱՀԿ չափանիշներին:

Ըստ Լեւոն Տեր-Պետրոսյանի, այդ հայտարարությունը փաստացի իշխանություններին հիմք է տվել մարտի 1-ին խաղաղ ցուցարարների հանդեպ կիրառել բռնություն: Եթե չլիներ այդ սադրիչ հայտարարությունը, ապա չէր լինի մարտի 1-ը, հայտարարել է Լեւոն Տեր-Պետրոսյանը: Նա նշում է, որ դիտորդներն իհարկե արձանագրում են, որ եղել են խախտումներ, բռնություններ, կեղծիքներ, ընտրակաշառք, լցոնումներ, սակայն նշել են, թե դա չի ազդել ընտրության ելքի վրա:

“Հետաքրքիր է, թե այդ դեպքում ինչն է ազդում ընտրության ելքի վրա` անձրեւը, քամին, եղանակը”, հեգնում է Լեւոն Տեր-Պետրոսյանը: Նա ասում է, որ երբ դիտորդներին հարցնում ես, թե այդ դեպքում ինչն է ազդում, եթե այդ ամենը` կեղծիքներ, լցոնումներ, բռնություններ, կաշառք, ահաբեկում, չի ազդում ելքի վրա, դիտորդները լռում են, ոչինչ չեն ասում: Իսկ երբ նրանց հարցնում ես, թե իսկ ինչ կլիներ, եթե իրենց երկրում լիներ նման ընտրություն, ապա ըստ Լեւոն Տեր-Պետրոսյանի, այդ հարցին ի պատասխան դիտորդները զարմանում են, թե ինչպես կարելի է նման բան պատկերացնել: Առաջին նախագահն այդ մոտեցումը համարում է երկակի ստանդարտ, նույնիսկ ռասիզմ, որ այն, ինչ դիտորդները չեն պատկերացնում իրենց երկրներում, մեր կարգի երկրների դեպքում համարում են ընդունելի:

Առաջին նախագահն ընդհանրապես հայտարարել է, թե Եվրոպայում այլեւս հոգի չի մնացել: Ըստ Լեւոն Տեր-Պետրոսյանի, իդեալիզմի որոշակի չափ մնացել է սկանդինավյան երկրներում եւ մի քիչ էլ Արեւելյան Եվրոպայի երկրներում: Մնացյալ տեղերում, Տեր-Պետրոսյանի բնորոշմամբ, անհոգություն է, բյուրոկրատիզմ:

Առաջին նախագահը հայտարարել է, որ եթե միջազգային հանրությունը, մասնավորապես եվրոպական կառույցները, Հայաստանում առկա իրողությունների հարցում չլինեն օբյեկտիվ, մասնավորապես, հետամուտ չլինեն ԵԽԽՎ ապրիլի 18-ին ընդունված բանաձեւի դրույթների կատարմանը եւ հերթական անգամ թույլ տան, որ Հայաստանի իշխանությունը խաբի, մոլորեցնի իրենց, կամ գա ինչ-ինչ հարցերում համաձայնության, ապա եվրոպական կառույցները Հայաստանում կհեղինակազրկվեն վերջնականապես, եւ ժողովուրդը նրանց կհայտարարի պերսոնա նոն-գրատա:

Հետարքրական է, որ իր ելույթի այդ բաժնում, ուր նա խոսում էր միջազգային կառույցների արձագանքի ու պահվածքի մասին, Լեւոն Տեր-Պետրոսյանը չանդրադարձավ Միացյալ Նահանագների եւ Ռուսաստանի դիրքորոշումներին:

ՍԵՐԺ ՍԱՐԳՍՅԱՆՆ ՈՒՆԻ ՏԱՐԱՆՋԱՏՎԵԼՈՒ ՇԱՆՍ

Այն, ինչ խաղաղ ցուցարարների հանդեպ տեղի ունեցավ մարտի 1-ին, եւ դրան նախորդած ու հաջորդած բոլոր ռեպրեսիվ քայլերը, ունեն ռեժիսոր, եւ դա Ռոբերտ Քոչարյանն է: Այդ մասին մայիսի 2-ին հայտարարել է Հայաստանի առաջին նախագահ, համաժողովրդական շարժման ղեկավար Լեւոն Տեր-Պետրոսյանը, ելույթ ունենալով շարժման երկրորդ կոնգրեսի առաջ: Լեւոն Տեր-Պետրոսյանը հայտարարել է, որ այդ ամենը ծրագրել է ու ղեկավարել Ռոբերտ Քոչարյանը, իսկ հետո ասուլիսների միջոցով փորձել է տեղի ունեցածի մասին ստեղծել մի պատկեր, որը լիովին սուտ է ու չի համապատասխանում իրականությանը:

Լեւոն Տեր-Պետրոսյանը մեջբերումներ է արել Ռոբերտ Քոչարյանի մարտի 1-ի, 5-ի, 20-ի ասուլիսներից, ուր նա խոսում է այն մասին, որ ոստիկանները եղել են անզեն, որ ցուցարարներին ընդամենը մարտի 1-ին փորձել են խուզարկել եւ այդ մասին հայտարարել են նախապես, որ Լեւոն Տեր-Պետրոսյանը չի եղել տնային կալանքի տակ եւ կարող էր գնալ ու հանգստացնել ցուցարարներին, երբ նրանք հավաքվել էին Ֆրանսիայի դեսպանատանը հարող հրապարակում:

Լեւոն Տեր-Պետրոսյանն ասում է, որ Քոչարյանի խոսքերն անվայել սուտ են, առեւտրականի մակարդակի սուտ, որը վկայում է, թե իրականում ինչ մակարդակի է հասել Հայաստանի պետությունը, եթե պետության ղեկավարի պաշտոնը զբաղեցրած մարդը այդպես ստում է: Առաջին նախագահը հայտարարել է, որ եթե ոստիկանությունը ցուցարարներին տեղեկացներ, որ ընդամենը եկել է Ազատության հրապարակ խուզարկության, ապա այդ կադրերը իշխանական լրատվամիջոցները կցուցադրեին օրնիբուն: Բացի այդ, Լեւոն Տեր-Պետրոսյանն ասում է, որ երեք-չորս հազար ոստիկանով չեն գալիս խուզարկության: Երեք-չորս հազար ոստիկանով, ըստ առաջին նախագահի, գնում են ճակատամարտ, գնում են գրոհի, գնում են ջարդի:

Լեւոն Տեր-Պետրոսյանը նաեւ հայտարարել է, թե մարտի 1-ին ինքը բանակցում էր Ռոբերտ Քոչարյանի հետ թե նրա անվտանգության ծառայության ղեկավար գեներալ Գրիգորի Սարկիսյանի եւ թե Եվրամիության դեսպանների միջոցով: Լեւոն Տեր-Պետրոսյանն ասում է, որ Ռոբերտ Քոչարյանին ինքն առաջարկել է գնալ ու հանգստացնել ցուցարարներին, բայց քանի որ ձեռնունայն գնալու դեպքում ցուցարարներն իրեն էլ չէին վստահի եւ այդ դեպքում այլեւս ոչ մի մարդ չէր կարող հանգստացնել նրանց, ապա Տեր-Պետրոսյանը Քոչարյանին առաջարկել է, որպեսզի հանրահավաքը տեղափոխվի Մատենադարան կամ Ազատության հրապարակ, եւ իշխանությունն էլ երաշխիք տա, որ հետագա օրերին էլ հնարավորություն կտրվի անցկացնել հանրահավաքներ: Ռոբերտ Քոչարյանը մերժել է: Հետո առաջարկվել է, որ Տեր-Պետրոսյանը գնա ու հանրությանը Ֆրանսիայի դեսպանատան մոտից տեղափոխի Դինամո մարզադաշտի մոտ կամ կայարանամերձ հրապարակ: Սակայն դա էլ մերժել է Լեւոն Տեր-Պետրոսյանը, մտածելով, թե դրանք քաղաքի կենտրոնից եւ միջազգային դիվանագիտական ներկայացուցչություններից հեռու տարածքներ են, ինչը հավանաբար իշխանությանը հնարավորություն կտա անկաշկանդ ուժ կիրառել ցուցարարների հանդեպ:

Ինչ վերաբերում է Ռոբերտ Քոչարյանի այն պնդմանը, թե Լեւոն Տեր-Պետրոսյանը կարող էր գնալ ու հանգստացնել ցուցարարներին, քանի որ նրան ոչ ոք չէր խանգարում, պարզապես նրա թիկնազորը չի ցանկացել ուղեկցել, ասելով, թե իրավունք չունի նրան ուղեկցել անօրինական միջոցառումների, ապա Լեւոն Տեր-Պետրոսյանն ասում է, որ այդպիսի բան չի եղել եւ դա նույնպես սուտ է, քանի որ իր թիկնազորը չէր էլ կարող նման բան ասել, քանի որ նրա պարտականությունն իր անվտանգությունն ապահովելն է: Այդ հիմա է, որ օրենքը փոխվել է, եւ թիկնազորը կարող է այդպիսի բան ասել, նշել է Լեւոն Տեր-Պետրոսյանը, ասելով, թե Ռոբերտ Քոչարյանը դեռ մարտի 5-ին ասուլիսի ընթացքում այդ մասին խոսելով երեւի թե մտքում պլանավորած է եղել օրենքն իր այդ մտքի համաձայն փոխելու քայլը:

Ընդհանրապես, Լեւոն Տեր-Պետրոսյանն ասում է, որ իշխանությունը մարտի 1-ն ու հետագա զարգացումները պլանավորել է դեռեւս դրանից մեկ շաբաթ առաջ: Որպես ապացույց, առաջին նախագահը ներկայացնում է քննչական գործը, որ հարուցվել է փետրվարի 24-ին: Այդ գործը Լեւոն Տեր-Պետրոսյանը համարում է իրավական անգրագիտության գլուխգործոց, կամ նման մի բան, քանի որ դրանում առկա է ուշագրավ ու զավեշտալի ձեւակերպում: Քննիչը, նշելով անուններ ու հանգամանքներ, խոսելով ազգային անվտանգության ծառայության ներկայացրած տվյալների մասին, գրել է, որ քրեական գործ է հարուցում “իշխանությունը յուրացնելու փաստի առիթով”: Այսինքն, քննիչի ձեւակերպումը, որ ընթերցել է կոնգրեսի առաջ Լեւոն Տեր-Պետրոսյանը, փաստացի վկայում է, որ Լեւոն Տեր-Պետրոսյանն ու համախոհները փետրվարի 24-ին յուրացրած են եղել հանրապետության իշխանությունը: Դահլիճում քննիչի այդ գրվածքը ծիծաղ է առաջացրել, իսկ Լեւոն Տեր-Պետրոսյանն էլ հայտարարել է, որ եթե իշխանությունը այդ ժամանակ յուրացրած լինեին, ինչի փաստի առիթով քննիչը գործ է հարուցել, ապա հիմա բանտում ոչ թե իրենց ընկերները կլինեին, այլ ավազակապետական համակարգի ղեկավարները:

Այդ ամենը Լեւոն Տեր-Պետրոսյանը ներկայացրել է այն բանի համար, որպեսզի ցույց տա, որ մարտի 1-ին իրականում եղել է ոչ թե բախում ցուցարարների ու ոստիկանների միջեւ, ինչպես նշում է իշխանական քարոզչամեքենան, այլ եղել է նախապես պլանավորված, մշակված եւ կազմակերպված սպանդ ժողովրդի դեմ, որի գլխավոր պատասխանատուն ու կազմակերպիչը, ըստ Լեւոն Տեր-Պետրոսյանի, Ռոբերտ Քոչարյանն է:

Ինչ վերաբերում է Սերժ Սարգսյանին, ապա առաջին նախագահը համարում է, որ նա որպես ընտրյալ նախագահ պետք է թույլ չտար, որպեսզի Ռոբերտ Քոչարյանը գնար այդօրինակ քայլի: Այդուամենայնիվ, Լեւոն Տեր-Պետրոսյանը համարում է, որ Սերժ Սարգսյանն ունի լավ հնարավորություն, հանրությանը ցույց տալու համար, որ ինքը պատասխանատու չէ այդ արյունահեղության համար: Շանսը, ըստ Լեւոն Տեր-Պետրոսյանի, մարտի 1-ի իրապես անկախ հետաքննություն ապահովելն է, այլապես, եթե անցնի հազար տարի էլ, Սերժ Սարգսյանն էլ միեւնույն է իր վրա կրելու է ժողովրդի արյան մեղքը:
_________________
Երբ որ նշան են բռնել թիկունքիդ, քո զգաստությունն էլ իմաստ չունի...

ՀՀ չորս քաղաքացիներ՝ ադրբեջանական բանտում

Ապրիլ 30, 2008

Ուղիղ տասն օր առաջ արտակարգ դեպք է տեղի ունեցել Հայաստանի զորամասերից մեկում ծագած վիճաբանության արդյունքում: Չորս երիտասարդներ` մոլորվելով անցել են հայ-ադրբեջանական սահմանը եւ ձերբակալվել են Ադրբեջանի անվտանգության ուժերի կողմից: Ամեն ինչ տեղի է ունեցել այն բանից հետո, երբ ապրիլի լույս 19-ի գիշերը Վայոց Ձորի մարզի Խաչիկ գյուղում (լուսանկարում) տեղակայված զինավանում ծառայող զինվորներից մեկը զանգահարել է ընկերներին, ասել, որ զորամասում իրեն «նեղում» են, եւ խնդրել է օգնության հասնել: Ընկերները` մոտ 13 հոգի, մեկնել են Խաչիկ, որտեղ վերջիններիս եւ զորամասի այլ զինվորների միջեւ վիճաբանություն է ծագել: Սթափեցնելու եւ վեճը կանխելու համար (համենայնդեպս, այդպես են ասում երիտասարդների ծնողները) զորամասի հրամանատարը նախազգուշական կրակոցներ է արձակել, որից վախենալով՝ երիտասարդները փախել են: Նրանցից չորսը մոլորվելով` հատել են սահմանը եւ արդեն տասն օր գտնվում են Ադրբեջանի Անվտանգության ծառայության մեկուսարանում: Ի դեպ, ՀՀ Պաշտպանության նախարարությունը կատարվածը պաշտոնապես հաստատել է միայն երեկ` արձագանքելով դեպքի առթիվ ադրբեջանական ԶԼՄ-ների հրապարակումներին:

ԼԵՎՈՆ ՏԵՐ-ՊԵՏՐՈՍՅԱՆԸ ԶԳՈՒՇԱՑՆՈՒՄ Է ԱԴՐԲԵՋԱՆԻՆ ԵՎ ԴԻՄՈՒՄ ՄԻԱՑՅԱԼ ՆԱՀԱՆԳՆԵՐԻՆ

Հայաստանի առաջին նախագահ Լեւոն Տեր-Պետրոսյանը, մայիսի 2-ին ելույթ ունենալով համաժողովրդական շարժման երկրորդ կոնգրեսի առաջ, հայտարարել է, որ Ադրբեջանը թող չփորձի մտածել, որ Հայաստանում առկա քաղաքական գործընթացներից, անօրինական իշխանության դեմ համաժողովրդական պայքարի հանգամանքից կարող է օգտվել եւ հաջողություն փնտրել հայ-ադրբեջանական շփման գոտում: Լեւոն Տեր-Պետրոսյանը նշել է, որ ագրեսիայի վտանգի դեպքում, եթե Ադրբեջանն իրապես փորձի գնալ նման քայլի, ինքն անձամբ հանդես կգա ժողովրդին ուղղված կոչով, որպեսզի համաժողովրդական շարժման համախոհները ժամանակավորապես դադարեցնեն իրենց պայքարը եւ միասնաբար լծվեն հայրենիքի պաշտպանության գործին: Դա Լեւոն Տեր-Պետրոսյանն ասել է ի պատասխան նաեւ իշխանական քարոզչության այն մեղադրանքների, թե իբր ընդդիմությունը ջուր է լցնում ադրբեջանական ջրաղացին: Առաջին նախագահը հայտարարել է նաեւ, որ եթե վերսկսվի պատերազմը, ապա հայրենիքի պաշտպանության առաջին ճակատում հաստատաբար կլինեն այն անձինք, որոնք ներկայում ենթարկվում են քաղաքական հետապնդման ու գտնվում են բանտերում:

Միեւնույն ժամանակ, Լեւոն Տեր-Պետրոսյանը նաեւ հայտարարել է, որ դիմում է Միացյալ Նահանգների կառավարությանն ու Հազարամյակի մարտահրավերների կորպորացիայի ղեկավարությանը, խնդրելով նրանց, որպեսզի Հայաստանի հանդեպ չկիրառեն տնտեսական պատժամիջոցներ եւ չնվազեցնեն կամ չդադարեցնեն Հայաստանի ֆինանսավորումը: Լեւոն Տեր-Պետրոսյանն ասում է, որ ի վերջո, արտասահմանյան այդ ծրագրերի դադարեցումից տուժելու է ժողովուրդը, ինչի համար էլ իր գլխավորած շարժումը խորապես մտահոգված է տնտեսական հնարավոր պատժամիջոցների մասին արտերկրի հայտարարություններով եւ այդ մտահոգությամբ էլ դիմում է Նահանգներին: Լեւոն Տեր-Պետրոսյանը նշել է, թե համաժողովրդական շարժման նպատակն է ոչ միայն ուղղորդել հասարակության քաղաքական, այլ նաեւ սոցիալական բողոքը, իսկ նկատի ունենալով, որ տեղի է ունենում սպառողական ապրանքների տոտալ թանկացում եւ մեծ է սոցիալական բունտի հավանականությունը, Լեւոն Տեր-Պետրոսյանը ասում է, որ շարժման նպատակը պետք է լինի կանխել հնարավոր սոցիալական բունտը, որը կարող է վնասել թե հասարակությանը, թե պետությանը:
_________________
Երբ որ նշան են բռնել թիկունքիդ, քո զգաստությունն էլ իմաստ չունի...