Հայաստանի նորություններ

Պետդումայում կքննարկվի նաեւ Ղարաբաղի հարցը

Մարտի 13-ին Ռուսատանի խորհրդարանի ստորին պալատում` Պետդումայում կքննարկվի Աբխազիայի, Մերձդնեստրի եւ Հարավային Օսեթիայի հարցը: Չճանաչված այդ երեք պետությունները դիմել էին Ռուսաստանի օրենսդիր մարմնին խնդրելով ճանաչել իրենց անկախությունը: Պետդումայի պատգամավոր Ալեքսեյ Օստրովսկին, որը ներկայացնում է Լիբերալ-դեմոկրատական կուսակցությունը, հայտարարել է, որ չի բացառում, որ կարող է նաեւ քննարվկել Լեռնային Ղարաբաղի եւ նրա կարգավիճակի շուրջ ստեղծված հարցերը:

Ադրբեջանական ուժերի կոտակում սահմանամերձ շրջանում

ԼՂՀ արտաքին գործերի նախարարությունն այսօր հանդես է եկել հայտարարությամբ, որում ասվում է, որ ԼՂՀ պաշտպանության բանակի օպերատիվ տվյալների համաձայն Լեռնային Ղարաբաղի եւ Ադրբեջանի զինված ուժերի շփման գծի Լեւոնարխ գյուղի շրջանում, ուր մարտի 4-ին Ադրբեջանի կողմից խախտվել է հրադադարի ռեժիմը, ադրբեջանական զինված կազմավորումների կուտակում է նկատվում: "Հերթական անգամ կոչ ենք անում Ադրբեջանի ղեկավարությանը` հրաժարվել կրակի դադարեցման ռեժիմը խախտելու փորձերից եւ նախազգուշացնում ենք, որ Ադրբեջանի զինված կազմավորումների ցանկացած ոտնձգության ԼՂՀ պաշտպանության բանակի կողմից կտրվի համարժեք պատասխան: Այս առումով մենք պատասխանատվություն չենք կրում շփման գծում պաշտոնական Բաքվի ապակառուցողական քայլերի պատճառով լարվածության հնարավոր ուժգնացման համար, քայլեր, որոնց, ցավոք, միջազգային միջնորդների կողմից

քաղաքական գնահատական չի տրվել",-ասված է հայտարարությունում:

Հայաստանի ՍԴ լիազորությունները պետք է ճանաչվեն՝ անկախ ընտրությունների վերաբերյալ նրա վճռից.ԵԽԽՎ
Հայաստանում նախագահական ընտրությունները դիտարկող ԵԽԽՎ ժամանակավոր հանձնաժողովի նախագահ Ջոն Պրեսկոտը կարծում է, որ Հայաստանի Սահմանադրական դատարանի իրավունքներն ու լիազորությունները պետք է ճանաչվեն՝ անկախ նախագահական ընտրությունների վերաբերյալ նրա վճիռից:

Ինչպես հաղորդեցին ՀՀ Ժ հասարակայնության հետ կապերի վարչությունից, այս մասին Պրեսկոտը հայտարարեց ուրբաթ Երևանում՝ ՕԵԿ նախագահ Արթուր Բաղդասարյանի հետ հանդիպման ժամանակ, որը փետրվարի 29-ին միացել է իշխող կոալիցիային, որի կազմում են Հայաստանի հանրապետական կուսակցոթւյունը և «Բարգավաճ Հայաստանը»:

ՀՀ Սահմանադրական դատարանն ավարտել է երեքշաբթի սկսված՝ փետրվարի 19-ի նախագահական ընտրությունների արդյունքները չեղյալ ճանաչելու մասին դիմումի քննարկումը՝ լսելով կողմերի եզրափակիչ խոսքը: Այժմ ՍԴ անդամները հեռացել են խորհրդակցական սենյակ՝ վճիռ կայացնելու համար:

ՍԴ-ն մեկ վարույթում է միավորել նախագահական ընտրությունների բողոքարկման մասին դիմումները, որոնք ներկայացրել են ՀՀ նախագահի թեկնածուների Տիգրան Կարապետյանը և Լևոն Տեր-Պետրոսյանը:

Պրեսկոտը նաև նշեց, որ ՀՀ առաջին նախագահ Լեւոն Տեր-Պետրոսյանն ասել է, որ պայմաններ ունի երկխոսության համար, որոնք նաև Եվրամիության պահանջներն են:

Փետրվարի 20-ից Երևանի կենտրոնում՝ Ազատության հրապարակում ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ, քայլերթեր՝ բողոքելով փետրվարի 19-ի նախագահական ընտրությունների արդյունքների դեմ: Մարտի 1-ին բողոքի ցույցերը վերածվել են անկարգությունների և ցուցարարների ու իրավապահ մարմինների ներկայացուցիչների միջև բախումների, որոնց հետևանքով զոհվել է ութ մարդ և վիրավորվել 131 մարդ: Նույն օրը ՀՀ նախագահ Ռոբերտ Քոչարյանը Երևանում 20-օր ժամկետով արտակարգ դրություն հայտարարեց:

Պրեսկոտը նշեց, որ բոլոր կողմերը հետաքրքրված են խնդիրը քննել և լուծել երկխոսությամբ: ԵԽԽՎ ժամանակավոր հանձնաժողովի նախագահը, կարևորելով արտակարգ դրության վերացումը, նշեց, որ կառավարության խնդիրն է արտակարգ դրության լինել թե չլինելը, «սակայն երկխոսություն սկսելու համար անհրաժեշտ են համապատասխան պայմաններ»:

Ջոն Պրեսկոտը գտնում է, որ անհրաժեշտ է զարգացնել և խթանել քաղաքական ակտիվությունը: Նա նշեց, որ Եվրախորհուրդը մտահոգություններ ունի՝ կապված մարդու իրավունքների խնդիրների հետ, որոնք դրված են Հայաստանի և Եվրախորհրդի միջև համաձայնությունների հիմքում:

Իր հերթին Արթուր Բաղդասարյանը նշեց, որ լինելով հիմնական ընդդիմադիր ուժերից մեկը` մինչ քարոզարշավի մեկնարկը հանդես է եկել կառուցողական երկխոսությամբ ՀՀ առաջին նախագահ Լեւոն Տեր-Պետրոսյանի և այլ ընդդիմադիր ուժերի հետ: Սակայն, ըստ պարոն Բաղդասարյանի, քարոզարշավի մեկնարկից հետո այդ երկխոսությունը բարդանում էր:

«Ես Լևոն Տեր-Պետրոսյանին առաջարկեցի ստորագրել համագործակցության փաստաթուղթ, սակայն նախկին նախագահը առաջարկեց ինձ միանալ իրեն կամ հեռանալ քաղաքականությունից»,- ասաց Բաղդասարյանը:

Խոսելով մարտի 1-ի գործողություններից` պարոն Բաղդասարյանը նշեց, որ իշխանությունները մտադրություն չեն ունեցել ցուցարարների նկատմամբ որևէ գործողություններ իրականացնել:

«Իշխանությունները պատրաստ էին սպասել ՍԴ-ի որոշմանը, սակայն իմանալով զենքի կուտակման մասին` որոշում է կայացվել ստուգում անցկացնել»,- ասաց Բաղդասարյանը:

Նա նշեց, որ իրավական խնդիրները պետք է լուծվեն իրավական դաշտում և չպետք է քաղաքականացվեն:

Բաղդասարյանը նաև ավելացրեց, որ ՀՀ վարչապետի առաջարկով ներգրավվելով կոալիցիայի մեջ և ստանձնելով լուրջ պատասխանատվություն` իրենք գնալու են ժողովրդավարական բարեփոխումների ճանապարհով

ՏԵՐ-ՊԵՏՐՈՍՅԱՆԻ ՆՊԱՏԱԿՆ Է «ՀԱՅԱՍՏԱՆՈՒՄ ՄԱՐՏԻ 1-ԻՆ ՏԵՂԻ ՈՒՆԵՑԱԾ ԻՐԱԴԱՐՁՈՒԹՅՈՒՆՆԵՐԻ ՄԻՋԱԶԳԱՅԻՆ ՀԵՏԱՔՆՆՈՒԹՅՈՒՆԸ»

Ձեր ուշադրությանը ներկայացվող հոդվածը առաջին անգամ տպագրվել է Ռազմավարական մշակույթի հիմնադրամի կայքէջում ս.թ. մարտի 6-ին (Մոսկվա)

Հայաստանում տեղի ունեցած վերջին իրադարձությունների խոր վերլուծությունը դեռ առջեւում է, բայց, այդուհանդերձ, մենք իրավունք ունենք արդեն այսօր որոշ եզրահանգումներ անելու։ Կցանկանայինք նախ եւ առաջ անդրադառնալ Հայաստանի նախագահի նախկին թեկնածու Լեւոն Տեր-Պետրոսյանի մի վերջնագրային հայտարարությանը։

Այսպես. 2008թ. մարտի 5-ին Հայաստանի Սահմանադրական դատարանի նիստում նա պահանջեց կազմակերպել, ոչ ավել ոչ պակաս, «մարտի մեկի իրադարձությունների միջազգային հետաքննություն»։

Փորձենք հասկանալ, թե ի՞նչ կարող է նշանակել «մարտի մեկի իրադարձությունների միջազգային հետաքննությունը»։

Մենք արդեն վարժվել ենք, որ Հայաստանի Հանրապետության առաջին նախագահը բավական հեշտությամբ է գործածում տերմիններ ու հասկացություններ, որոնց իրավական բովանդակությունը չի պարզաբանվում։ Մինչդեռ որեւէ իրադարձության «միջազգային հետաքննություն» հասկացությունն ունի միանգամայն կոնկրետ բովանդակություն եւ իրագործման կանոնակարգված ընթացակարգեր։

Նախ՝ դա նշանակում է, որ ՄԱԿ-ի Անվտանգության խորհուրդը, որն էլ արտոնում է այդօրինակ «միջազգային հետաքննությունները», պետք է ընդունի, որ տվյալ իրադարձությունը այս կամ այն պետության կողմից իր միջազգային պարտավորությունների խախտում է եւ այն անվտանգության սպառնալիք է ստեղծում տարածաշրջանում եւ աշխարհում։

Երկրորդ՝ ՄԱԿ-ի հովանու ներքո պետք է ստեղծվի միջազգային հատուկ քննչական մարմին՝ ինքնիշխան պետությունում աշխատանքի արտակարգ լիազորություններով օժտված մի հանձնաժողով։

Երրորդ՝ այդպիսի քննչական հանձնաժողովի գործունեությունը ենթադրում է, նախ եւ առաջ, անսահմանափակ լիազորությունների տրամադրում՝ «Մարտի 1-ի» գործի անխտիր բոլոր նյութերը մանրակրկիտ ուսումնասիրելու համար, ներառյալ Հայաստանի ցանկացած քաղաքացու, այդ թվում՝ պաշտոնյաների, ոստիկանության, ազգային անվտանգության ծառայության եւ զինված ուժերի սպաների, ինչպես նաեւ պետության բարձրագույն ղեկավարների հարցաքննությունների ենթարկելը։ Ընդ որում, վերջիններս ցուցմունքներ տալուց հրաժարվելու իրավունք չեն ունենա։

Չորրորդ՝ ինչպես ցույց է տալիս միջազգային հարուստ փորձը, բազմազգ քննչական խմբի մասնագետները (քննիչներ, դատախազներ, քրեագետներ, հատուկ ծառայությունների աշխատակիցներ, թարգմանիչներ եւ այլն), ի հեճուկս իրենց տրված մանդատի, ներկայացնում ու պաշտպանում են իրենց իսկ պետությունների շահերը, այսինքն՝ կատարում նրանց քաղաքական պատվերը։ Առհասարակ, հե՛նց դրա համար էլ ստեղծվում են այդօրինակ հանձնաժողովները։ Ըստ այդմ էլ դրանց աշխատանքը, որպես կանոն, ձգձգվում է այնքան ժամանակ, որքան պահանջվում է քաղաքական պատվերը մինչեւ վերջ կատարելու համար։ Հիշենք, թե ինչպես էր 1991-ից մինչեւ 1998 թվականը ՅՈՒՆՍԿՕՄ-ը («Միավորված Ազգերի կազմակերպության հատուկ հանձնաժողովը») զբաղված, մասնավորապես, Իրաքում գոյություն չունեցող միջուկային զենքի շարունակական որոնումներով, ու թե ինչպես նրա աշխատանքի ողջ ընթացքն օգտագործվեց Իրաքի դեմ ամեն տեսակի ճնշումների, նրա անկախությունը սահմանափակող ու պետական մեքենան խափանող նորանոր պատժամիջոցների սահմանման ու պահպանման համար։

Իհարկե, Հայաստանի Հանրապետության առաջին նախագահը, առաջարկելով կազմակերպել «մարտի մեկի իրադարձությունների միջազգային հետաքննություն», կարող է եւ չիմանալ այդ տարրական ճշմարտությունները, որոնք միջազգային իրավագետների եւ ազգային անվտանգության գծով մասնագետների ուսումնասիրության առարկան են։ Բայց այդ դեպքում մենք իրավունք ունենք եզրակացնելու, որ Լ.Տեր-Պետրոսյանն անտեղյակ եւ անգետ է այն հարցերում, որոնց մասին ինքն իրեն թույլ է տալիս հրապարակավ արտահայտվելու։ Իսկ եթե նա գիտի, թե ինչի մասին է խոսքը, եւ, այդուամենայնիվ, շարունակում է պնդել իր առաջարկը, ապա հիմնավորված կասկածներ են առաջանում անկախ Հայաստանի բուն գաղափարին նրա նվիրվածության վերաբերյալ։ Առանձնակի մտավոր ջանքեր չեն պահանջվում՝ պատկերացնելու մեր արտահայտած դատողություններին Լ.Տեր-Պետրոսյանի ու իր կողմնակիցների արձագանքը. «Իշխանությունները վախենում են միջազգային հետաքննությունից, ինչն ապացուցում է ընդդիմության իրավացիությունը» եւ այլն։ Բայց եկեք առանց հիստերիայի զննենք ՀՀ նախկին նախագահի առաջարկի իրականացման հնարավոր հետեւանքներն ու էությունը։

Գաղտնիք չէ, որ միջազգային կազմակերպություններում, որոնց հովանու ներքո ստեղծվում են միջազգային քննչական հանձնաժողովները, առաջին ջութակը նվագում է ԱՄՆ-ը եւ իր դաշնակիցները։ Եթե մի պահ պայմանականորեն պատկերացնենք, թե նմանօրինակ քննչական մարմին է ստեղծվել Հայաստանի սույն թվականի մարտի 1-ի իրադարձությունների առնչությամբ, ապա դժվար չէ կռահել, որ միջազգային քննչական խմբում կգերակշռեն հենց արեւմտյան երկրների ներկայացուցիչները, որոնք իրենց յուրահատուկ աշխարհաքաղաքական շահերն ու խնդիրներն ունեն տարածաշրջանում։ Քննչական խմբի անդամներն օժտված կլինեն իրավաբանական անձեռնմխելիությամբ Հայաստանի ողջ տարածքում՝ համաձայն Արտոնությունների եւ իմունիտետների (անձեռնմխելիության) մասին Միացյալ ազգերի կոնվենցիայի։ Միաժամանակ նրանք ակտիվորեն կզբաղվեն լրտեսական գործունեությամբ, ինչպես դա արել են, օրինակ, հենց ՅՈՒՆՍԿՕՄ-ի ղեկավարներն ու անդամները եւ հետագայում նույնիսկ հրապարակավ հայտարարել այդ մասին։ Այսպես, Washington Post եւ Boston Globe թերթերը, անանուն աղբյուրներ հիշատակելով, հայտնել են, որ ՅՈՒՆՍԿՕՄ-ի ղեկավար Ռիչարդ Բաթլերը համագործակցում էր ամերիկյան ԿՀՎ-ի հետ, մասնավորապես նպատակ ունենալով էլեկտրոնային լրտեսություն հաստատել Իրաքի ռազմական հաղորդուղիների վրա։ Այդ տեղեկությունը հաստատեց ՅՈՒՆՍԿՕՄ-ի նախկին անդամ Ռոդ Բարթոնը՝ 2005 թ. փետրվարին ավստրալիական հեռուստատեսությամբ ելույթ ունենալիս։ Հավաքված տեղեկատվությունը օգտագործվեց Իրաքի դեմ ռմբահարումների գերճշգրիտ ուղղորդման համար։

Որպեսզի ավելի լիարժեք պատկերացնեք, թե ինչ լիազորություններ են ընձեռվում նմանօրինակ քննչական խմբերին, մի քանի պարբերություն մեջբերենք ՄԱԿ-ի Անվտանգության խորհրդի թիվ 1595 բանաձեւից, որով հիմնադրվեց «ՄԱԿ-ի միջազգային անկախ քննչական հանձնաժողովը»՝ 2005թ. Լիբանանի նախկին վարչապետ Ռաֆիկ Հարիրիի սպանության հետաքննության գործում «լիբանանյան իշխանություններին օժանդակություն ցուցաբերելու» նպատակով։

ՄԱԿ-ի Անվտանգության խորհուրդը որոշում է, որ սեփական պարտականությունների արդյունավետ կատարումն ապահովելու համար Հանձնաժողովը պետք է.

-լիակատար օժանդակություն ստանա լիբանանյան իշխանությունների կողմից, ներառյալ լիակատար հնարավորություն՝ օգտվելու նրանց ունեցած բոլոր այն փաստաթղթերից, վկայություններից ու ֆիզիկական տվյալներից եւ ապացույցներից, որոնք Հանձնաժողովը կհամարի հետաքննությանն առնչվող.

-լիազորություններ ունենա՝ հավաքելու այդ ահաբեկչական գործողության հետ կապված ցանկացած լրացուցիչ տվյալներ ու ապացույցներ, ինչպես փաստաթղթային, այնպես էլ ֆիզիկական, ինչպես նաեւ հարցաքննություններ անցկացնելու Լիբանանի բոլոր այն պաշտոնատար եւ այլ անձանց հետ, որոնց Հանձնաժողովը կհամարի հետաքննությանն առնչվող.

-օգտվի Լիբանանի ողջ տարածքում տեղաշարժվելու ազատությունից, ներառյալ ազատ ելումուտը բոլոր այն վայրեր ու օբյեկտներ, որոնք Հանձնաժողովը կհամարի հետաքննությանն առնչվող,

-ստանա ծառայություններ, որոնք անհրաժեշտ են իր գործառույթների կատարման համար, ինչպես նաեւ ապահովվի ոչ միայն տարածքներով, անձնակազմով ու գույքով, այլեւ արտոնություններով եւ իմունիտետներով, որոնց իրավունքը նա ունի, համաձայն Արտոնությունների եւ իմունիտետների մասին Միացյալ ազգերի կոնվենցիայի։

2006թ. փետրվարին արդեն որոշում ընդունվեց Լիբանանի հարցերով Հատուկ տրիբունալի ստեղծման մասին, իսկ 2007թ. դեկտեմբերին Հաագան համաձայնեց դառնալ Ռ.Հարիրիի սպանության գործով դատավարության անցկացման վայրը։

Իսկ այժմ՝ Լ.Տեր-Պետրոսյանի առաջարկի ենթադրյալ իրականացման հետեւանքների մասին։

Այդպիսի մարմնի ստեղծման բուն գործընթացը՝ ՄԱԿ-ի Անվտանգության խորհրդի օրակարգ տվյալ առաջարկը մտցնելը, այդ միջազգային ատյանում Հայաստանի ներքին խնդրի քննարկումն ու բարձրաձայնումը, մանդատի վերաբերյալ վեճերը եւ այլն, արդեն իսկ սաստիկ հարված կլինի Հայաստանի Հանրապետության ինքնիշխանությանն ու հեղինակությանը։

Հայաստանում այդօրինակ խմբի աշխատանքի ընթացքն, իր հերթին, կործանիչ ազդեցություն կունենա Հայաստանի ազգային անվտանգության ողջ համակարգի համար, որը, ինչպես ցույց տվեցին վերջին իրադարձությունները, լուրջ թերություններ ունի եւ դեռեւս ձեւավորման փուլում է։ Փաստորեն նախկին նախագահն առաջարկում է հանձնել Հայաստանի ինքնիշխանության կարեւորագույն մասը՝ նրա արդարադատության համակարգը, միջազգային այն ուժերի վերահսկողությանը, որոնք բացարձակապես շահագրգռված չեն հայկական պետության ամրապնդման գործում։ Եթե հաշվի առնենք նաեւ հայ-ադրբեջանական հակամարտության գործոնը, որը ցանկացած պահի կարող է փոխարկվել Հայաստանի դեմ նոր ագրեսիայի, ապա միջազգային այդօրինակ հանձնաժողովի ստեղծումով հայկական անկախ պետականությունը, ինչպես ասում են, կերգի կարապի իր երգը։ Ըստ երեւույթին, զուր չէր Լ.Տեր-Պետրոսյանը 2008թ. փետրվարի 22-ի իր միտինգում ներշնչում ունկնդիրներին, թե «ազատությունն այնպիսի արժեք է, որը վեր է անգամ անկախությունից, անգամ բոլոր հաղթանակներից, անգամ պետականությունից։ Ո՞ւմ է պետք այն պետությունը, այն իշխանությունը, այն անկախությունը, այն հաղթանակը, որը մարդուն չի տալիս ազատություն»։

Համադրելով Լ.Տեր-Պետրոսյանի այս անարխիստական հայեցակարգը Հայաստանի ազատագրված տարածքը Ադրբեջանին հանձնելու եւ այնտեղ միջազգային «խաղաղարարներ» մտցնելու նրա սեւեռուն գաղափարի, Արեւմուտքին ուղղված՝ Հայաստանի ներքին գործերին անպատկառորեն միջամտելու նրա շարունակվող կոչերի, ինչպես նաեւ «մարտի մեկի իրադարձությունների միջազգային հետաքննության» վերաբերյալ նրա վերջին առաջարկի հետ, կարելի է ամենայն վստահությամբ եզրակացնել. Լ.Տեր-Պետրոսյանը Հայաստանում ներկայացնում եւ լոբբինգավորում է համաշխարհային քաղաքականության որոշակի հեղինակների շահերը, որոնք ընդհանուր ոչինչ չունեն հայկական պետականության եւ հայ ժողովրդի շահերի հետ։ Ըստ երեւույթին, Լ. Տեր-Պետրոսյանի նախընտրական եւ հետընտրական ողջ ծրագրի մեխը մարտի 5-ին նրա հնչեցրած «իրադարձությունների միջազգային հետաքննությունն» էր Հայաստանում, ինչի համար էլ հե՛նց հրահրվեցին սույն թվականի մարտի 1-ի անկարգությունները։

Այդ վիրտուալ, բայց միանգամայն ճանաչելի հեղինակների ծրագրերի իրականացումը մենք հստակ տեսնում ենք Իրաքում, որտեղ, բազմաթիվ վերլուծաբանների կարծիքով, պետականության կորուստն ու երկրի փլուզումը լոկ ժամանակի հարց է։ Պետք է նաեւ ընդունել, որ Իրաքում տեղի ունեցած իրադարձությունները նախորոշվեցին հենց վերոհիշյալ ՅՈՒՆՍԿՕՄ-ի հանձնաժողովի աշխատանքով։ Բայց եթե Սադամ Հուսեյնի ռեժիմն իսկապես հանցավոր էր եւ արժանի միջազգային հանրության դատապարտմանը, ապա մեր դեպքում խոսքը վերաբերում է ՀՀ առաջին նախագահի հավակնություններին եւ վնասարար գործունեությանը, որն անձամբ փորձում է նույնպիսի կործանիչ հարվածի տակ դնել վերստեղծված հայկական պետականությունը, որն իր քսան տարուց էլ պակաս կենսաժամանակահատվածում անցավ գոյության համար մղված պատերազմի ու տնտեսական շրջափակման միջով, որն այժմ էլ ենթակա է տեղեկատվական ու հոգեբանական հզորագույն գրոհների եւ թուրք-ադրբեջանական նոր ներխուժման սպառնալիքի։ Հետաքրքիր է նաեւ ընդգծել, որ իր նախագահության շրջանում Լ.Տեր-Պետրոսյանը երբեք «միջազգային հետաքննության» հարց չի բարձրացրել, օրինակ, Սումգայիթում, Բաքվում, Կիրովաբադում, Գետաշենում, Մարաղայում եւ հայաբնակ այլ վայրերում ադրբեջանական իշխանությունների կազմակերպած հայկական ջարդերի ու կոտորածի առնչությամբ։

Վերը նկարագրվածը՝ «մարտի մեկի իրադարձությունների միջազգային հետաքննության» Լ.Տեր-Պետրոսյանի պահանջի ընդամենը մի քանի հնարավոր հետեւանքներն են, որոնք, հուսով ենք, երբեք չեն իրականանա Հայաստանի պարագայում. հայ ժողովուրդը նման բան թույլ չի տա։

Միաժամանակ Հայաստանի իշխանությունները պետք է ընդունեն, որ բազմաթիվ այլ սխալների հետ մեկտեղ (սոցիալական եւ կադրային քաղաքականության, հասարակայնության ձայնը լսելու անկարողության եւ այլ հարցերում), թույլ տվեցին նաեւ ռազմավարական սխալ. այն է՝ իրենց թողտվությամբ (իսկ երբեմն էլ հովանավորությամբ) Հայաստանում, դրսից ցուցաբերվող աջակցության շնորհիվ, արմատներ գցեց ու ինքնակազմակերպվեց հզոր հինգերորդ զորասյուն՝ Լ. Տեր-Պետրոսյանի եւ ՀՀՇ-ի գլխավորությամբ։

Բուժել այդ հիվանդությունն առանց ցավի, ավա՜ղ, արդեն անհնար է, պահը կորսված է։ Բայց «հիվանդ ատամի» հեռացնելը, ամեն դեպքում, պարտադիր է։

ԱՐՄԵՆ ԱՅՎԱԶՅԱՆ Քաղաքագիտության դոկտոր, «Արարատ» ռազմավարագիտական կենտրոնի տնօրեն

ՄԱՐՏԻ 30-ԻՆ ԿԱՆՑՆԵՆՔ «ԱՄԱՌԱՅԻՆ» ԺԱՄԱՆԱԿԻՆ
Մարտի վերջին կիրակի օրը` այսինքն մարտի 30-ին` ժամը 02:00-ին, Հայաստանի Հանրապետության տարածքում ժամացույցի սլաքները պետք է տանել մեկ ժամ առաջ: Այս մասին տեղեկացանք առևտրի և տնտեսական զարգացման նախարարության պաշտոնական կայքէջից: Հիշեցնենք, որ ամառային և ձմեռային ժամանակներին անցումը կատարվում է Հայաստանի Հանրապետության տարածքում ժամանակի հաշվարկման կարգի մասին Հայաստանի Հանրապետության օրենքի համաձայն:

Սերժ Սարգսյանն իր բլոգն է բացել «Life journal»-ում
Հայաստանի նորընտրիր նախագահ, վարչապետ Սերժ Սարգսյանն իր բլոգն է բացել «Life journal»-ում՝ http://serzhsargsyan.livejournal.com� Այսօր բլոգում տեղեկություն կա այն մասին, որ մարտի 13-ին Սերժ Սարգսյանը պատասխանելու է իր հայրենակիցների հարցերին։

Հայաստանում դեռևս անօթևան է մնում 1988թ. երկրաշարժից տուժած 7665 ընտանիք
2008թ. մարտի 1-ի դրությամբ Շիրակի և Լոռու մարզերում դեռևս անօթևան է մնում, համապատասխանաբար, 4 հազար 666 և 2 հազար 999 ընտանիք, որոնք տուժել են 1988թ. դեկտեմբերի 7-ի ավերիչ երկրաշարժից։

Նիցցայում մարտի 15-ին մեկնարկում է Ամբեր-2008 շախմատային գերմրցաշարը
Ամբեր-2008 17-րդ միջազգային շախմատային գերմրցաշարը տեղի կունենա Նիցցայում (Ֆրանսիա)՝ մարտի 15-20-ը։ Ինչպես երկուշաբթի «Նովոստի-Արմենիա» գործակալությանը հայտնեցին հանրապետության շախմատի ֆեդերացիայից, մրցախաղին կմասնակցի հայ գրոսմայստեր Լևոն Արոնյանը։

Հայաստանի առաջին նախագահ Լեւոն Տեր-Պետրոսյանի գրասենյակի ղեկավար Ավետիս Ավագյանը խոստովանել է, որ իշխանությունների կողմից ձեռնարկվող միջոցները մեծ հարված են հասցրել Տեր-Պետրոսյանի թիմին: «Ձերբակալվել է ողջ ակտիվը: Մեկուսարանում են Զուրաբյանը եւ Արզումանյանը, թաքնվում է Արամ Սարգսյանը: Մենք կաթվածահար ենք», - ասել է Ավետիս Ավագյանը «Կոմերսանտ» թերթին տված հարցազրույցում: Միաժամանակ, թերթը մեջբերում է Հայաստանի ժողովրդական կուսակցության առաջնորդ Ստեփան Դեմիրճյանի խոսքերը. - «Պայքարը չի ավարտվել: Ժողովուրդը վրդովված է եւ վիրավորված: Մարդիկ ցանկանում են, որ հանրահավաքները շարունակվեն»:

ՍԵՐԺ ՍԱՐԳՍՅԱՆ. «ԼԵՒՈՆ ՏԵՐ-ՊԵՏՐՈՍՅԱՆԻ ՁԵՐԲԱԿԱԼՄԱՆ ՄԱՍԻՆ ԼՈՒՐԵՐԸ ՉԵՆ ՀԱՄԱՊԱՏԱՍԽԱՆՈՒՄ ԻՐԱԿԱՆՈՒԹՅԱՆԸ»

Նախագահության նախկին թեկնածու, Հայաստանի առաջին նախագահ Լեւոն Տեր-Պետրոսյանի ձերբակալության մասին լուրերը իրականությանը չեն համապատասխանում: Այդ մասին այսօր հայտնել է Հայաստանի վարչապետ Սերժ Սարգսյանը: Տնտեսագիտական համալսարանի ուսանողների հետ հանդիպման ժամանակ վարչապետը նաեւ կարծիք է հայտնել, թե Լեւոն Տեր-Պետրոսյանի պատասխանատվության աստիճանը պետք է որոշի ժողովուրդը:

ՀՀ ոստիկանության պետը ԵԽ մարդու իրավունքների հանձնակատարի հետ քննարկել է երկրի ներքաղաքական իրավիճակը
ՀՀ ոստիկանության պետ, գեներալ-գնդապետ Հայկ Հարությունյանը Եվրախորհրդի մարդու իրավունքների հանձնակատար Թոմաս Համարբերգի հետ քննարկել է հանրապետության ներքաղաքական իրավիճակը։

Երևանի Հրազդանի կիրճում հայտնաբերվել է զենք և զինամթերք
Երևանի Հրազդանի կիրճում հայտնաբերվել է զենք և զինամթերք։ Ինչպես ուրբաթ «Նովոստի-Արմենիային» հաղորդեցին ՀՀ ոստիկանության լրատվական ծառայությունից:

Հայ Առաքելական Եկեղեցին մարտի 16-ին տոնախմբելու է Ծաղկազարդը
Ինչպես «Նովոստի-Արմենիա» գործակալությանը հայտնեցին Մայր Աթոռ Սուրբ Էջմիածնի տեղեկատվական համակարգից, Ծաղկազարդի տոնը Գարեգին Բ Ամենայն Հայոց Կաթողիկոսի բարձր տնօրինությամբ հռչակվել է որպես Մանուկների օրհնության օր:

Ս. ՍԱՐԳՍՅԱՆ-ԱԼԻԵՎ ՀԱՆԴԻՊՈՒՄԸ ՇԱՏ ՀԱՎԱՆԱԿԱՆ Է
Ադրբեջանի նախագահ Իլհամ Ալիեւը դեմ չէ ՆԱՏՕ-ի՝ ապրիլի 2-4-ը Բուխարեստի գագաթաժողովի շրջանակներում Հայաստանի նորընտիր նախագահ Սերժ Սարգսյանի հետ հանդիպելուն, «Թրենդին» ասել է Ադրբեջանի նախագահի գործադիր աշխատակազմի միջազգային կապերի բաժնի վարիչ Նովրուզ Մամեդովը, հաղորդում է Արմենպրեսը: Մամեդովը նշել Է, որ Ադրբեջանը Հայաստանի հետ բանակցությունները շարունակելու իր սկզբունքային համաձայնության մասին ԵԱՀԿ-ի Մինսկի խմբի ամերիկացի համանախագահ Մեթյու Բրայզային հայտնել է տարածաշրջան նրա կատարած վերջին այցի ժամանակ: