Հայաստանի նորություններ

Հայաստանում 2007 թ.-ի լավագույն երգիչ է ճանաչվել Արամեն, լավագույն երգչուհի՝ Սիրուշոն

Հայաստանի լավագույն երգիչներն ու երաժշտական համույթներն արժանացել են 2007 թ.-ի ազգային երաժշտական մրցանակներին:

Նախօրեին Հայաստանի հանրային հեռուստաընկերության (ՀՀՀ) ուղիղ եթերում հեռարձակվում էր հինգրերորդ ամենամյա մրցանակաբաշխությունը: Ինչպես արարողության ժամանակ հայտարարել է հաղորդավար, Հանրային ռադիոյի տնօրեն Արմեն Ամիրյանը, այս տարի առաջին անգամ մրցանակներ էին շնորհվում ոչ միայն փոփ-երաժշտության բնագավառում, այլ նաև ջազի, դասական, ազգային և ազգագրական երաժշտության ոլորտներում:

Ժյուրիի որոշմամբ, որի կազմում էին հայկական հեռուստատեսության և շոու-բիզնեսի հեղինակավոր գործիչներ, փոփ-երաժշտության բնագավառում 2007 թ.-ի «Տարվա հայտնություն» է ճանաչվել երգիչ Վարդան Բադալյանը, դասական երաժշտության բնագավառում՝ Սերգեյ Սմբատյանի ղեկավարության տակ Հայաստանի պետական երիտասարդական նվագախումբը:

«Տարվա լավագույն խումբն» է «Armenoids»-ը, «Ակունք» համույթը մրցանակ է ստացել «Լավագույն ազգագրական համույթ» անվանակարգում, հայկական եկեղեցական շարականների և ազգային երգերի հայտնի կատարող Աննա Մայիլյանը մրցանակ է ստացել «Ethno Vocal» ալբոմի համար, տարվա լավագույն փոփ-ալբոմի համար ազգային մրցանակի է արժանացել Հայկոն՝ «Մի խոսքով» ալբոմի մի շարք ստեղծագործությունների համար:

Լավագույն դասական նախագիծ է ճանաչվել Պետական կամերային համույթի համերգը Ստեփանակերտում (Լեռնային Ղարաբաղի Հանրապետություն), լավագույն ջազային նախագիծն է՝ Արմեն Մարտիրոսյանի ղեկավարած «Հայաստանի ջազ-բենդի» 10-ամյակին նվիրված համերգը:

Պրոդյուսեր, ռեժիսոր Հրաչ Քեշիշյանը մրցանակի է արժանացավել տարվա լավագույն տեսահոլովակի համար՝ «Եթե դու գաս» Էմմի և Սուպեր Սաքոյի կատարմամբ, իսկ «Տարվա հիթ» է ճանաչվել Սոֆի Մխեյանի «Օրը և ներկան» երգը:

Ժյուրիի որոշմամբ՝ «Լավագույն ազգային երգիչ» անվանակարգում մրցանակի է արժանացել Արսեն Գրիգորյանը (Մրրոն), «Լավագույն ազգային երգչուհի» անվանակարգում մրցանակի է արժանացել Աննա Մայիլյանը:

Ամենահեղինակավոր՝ «Տարվա լավագույն երգիչ» և «Տարվա լավագույն երգչուհի» անվանակարգերում մրցանակի են արժանացել Արամեն և Սիրուշոն (որը ներկայացնելու է Հայաստանը 2008 թ.-ին Սերբիայում կայանալիք Եվրոտեսիլի ժամանակ:

Երաժշտական հատուկ մրցանակներ են շնորհվել «Շարմ հոլդինգ» պրոդյուսերական ընկերությանը՝ «Հատուկ նշանակության երգեր» (ռազմահայրենասիրական բնույթի երգեր) նախագծի համար, «Շանթ» հեռուստաընկերությանը՝ «Ժողովրդական երգիչ» հեռուստանախագծի համար, Պետական երիտասարդական նվագախմբին՝ Բեռլինում կայացած դասական երաժշտության համերգի համար, «Ջազ-թայմ» հեռուստանախագծի ստեղծող և հաղորդավար՝ ջազմեն Արմեն Թութունջյանին (Չիկո) Հատուկ մրցանակի հետմահու արժանացել է հայտնի ռադիոհաղորդավար Սեդրակ Դավիդյանը (DJ Սեդրակ)՝ ռադիոյում հայկական երաժշտությունը քարոզելու համար:

Տիգրան Նաղդալյանի անվ. մրցանակին արժանացել է Հայկոն՝ «Մի վախեցիր» և «Ոչինչ չի մնա» ֆիլմերի սաունդ-թրեքերի համար, որոնք նկարահանվել են 2007 թ.-ին «Երևան» կինոստուդիայում՝ ՀՀՀ-ի և HK Production պրոդյուսերական ընկերության պատվերով:

Մրցանակաբաշխության կազմակերպիչներն էին Հայաստանի հանրային հեռուստաընկերությունը և ՀՀ մշակույթի նախարարությունը՝ «Շարմ հոլդինգ» պրոդյուսերական ընկերության մասնակցությամբ

Երևանում այրվում են «Գրանդ Քենդի» հրուշակեղենի ձեռնարկության պահեստային շինությունները
16:06 | 12/ 02/ 2008

ԵՐԵՎԱՆ, 12 փետրվարի./Նովոստի-Արմենիա/. Երևանում այրվում են «Գրանդ Քենդի» հրուշակեղենի ձեռնարկության պահեստային շինությունները։

«Հրդեհի մասին ազդանշանը ստացվել է տեղի ժամանակով 13.38-ին։ Այս պահին դեպքի վայրում աշխատում են չորս հրշեջ հաշվարկներ»,-«Նովոստի-Արմենիա» գործակալությանը հայտնեցին Հայաստանի փրկարար ծառայությունից։

Ծառայության աշխատակիցը հայտնեց, որ նախնական տվյալներով, պահեստային տարածքների 900 քառ. մետրը ծածկվել է ծխով։ Հրդեհի բնույթից կարելի է եզրակացնել, որ այրվում են պլաստմասե նյութերը։

«Գրանդ քենեդի» ընկերությունը մտնում է Grand Holding-ի կազմի մեջ, որի մեջ մտնում է «Grand Sun» էլեկտրոնային լամպերի արտադրության գործարանը, «Grand Tobacco» և «International Masis Tabak» ծխախոտային ընկերությունները, ինչպես նաև «Հայրենիք» և «Ար» հեռուստաընկերությունները

Հատուկ հանձնաժողովը Երևանում հետաքննում է CRJ-100 ինքնաթիռի վթարի պատճառները

Երևանում բելառուսական «Բելավիա» ավիաընկերության CRJ-100 ինքնաթիռի կործանման վայրում աշխատում է վթարի պատճառները հետաքննող հատուկ հանձնաժողովը, ուրբաթ «Նովոստի-Արմենիա» գործակալությանը հայտնեց Հայաստանի քաղաքացիական ավիացիայի գլխավոր վարչության (ՔԱԳՎ) մամուլի քարտուղար Գայանե Դավթյանը։ «Հանձնաժողովը բաղկացած է 22 մարդուց, որոնց թվում են տասը տեղի մասնագետներ, Միջպետական ավիացիոն կոմիտեի երկու նրկայացուցիչներ և Բելառուսից ժամանած տասը մասնագետներ»,-հայտնեց նա:

ԱԴՐԲԵՋԱՆԱԿԱՆ ԻՆՔՆԱԹԻՌԸ ՓՈՐՁԼ Է ՆԵՐԽՈՒԺԵԼ ՀԱՅԱՍՏԱՆԻ ՕԴԱՅԻՆ ՏԱՐԱԾՔ
Հայաստանի Հանրապետության Պաշտպանության Նախարարության մոտ կանգնած աղբյուրներից հայտնի է դարձել, որ վերջին ժամանակները հաճախակիացել են հայ-ադրբեջանական սահմանի և ԼՂՀ սահմանային գոտու շրջանում Ադրբեջանական ռազմա-օդային ուժերի կողմից կատարվող թռիչքները:

Երեկ ուշ երեկոյան ադրբեջանական մի ռազմական ինքնաթիռ փորձլ է ներխուժել Հայաստանի օդային տարածք:

Աղբյուր` Panorama.am

ՍԵՎ ԱՐԿՂԵՐԸ ՎԵՐԾԱՆՎՈՒՄ ԵՆ

«Բելավիա»-ին պատկանող Երևան-Մինսկ չվերթի ինքնաթիռը վթարի է ենթարկվել տեղական ժամանակով ժամը 4:19-ին: Դուրս գալով «Զվարթնոց»-ի թռիչքուղուց, անձնակազմը դիսպետչերին հայտնել է, որ ինքնաթիռն անընդհատ թեքվում է ձախ կողմի վրա: Բարձրանալով 4-5 մետր, օդանավը շրջվել է ձախ թևի վրա: Այդ վիճակով այն գնացել է թռիչքուղու ողջ երկարությամբ: Քիչ առաջ լրագրողների հետ հանդիպման ժամանակ նման մանրամասներ հրապարակեց ՔԱԳՎ պետ Արտյոմ Մովսեսյանը:

Նրա խոսքով, ուղևորներից երկուսը օգնել են անձնակազմին` բացելու վթարային դուռը: Ինքնաթիռի թեքվելուց հետո հրդեհ է բռնկվել: Դեպքից 50 վայրկյան հետո տեղ են հասել հրշեջները:

«Մեր կորուստները նվազագույնն են»,-նկատեց Ա. Մովսեսյանը և ավելացրեց, որ «պայթյուն որպես այդպիսին չի երևում, սակայն ոմանք աղմուկ են լսել»: Ավիակերոսինը թափվել է գետնին:

Նշենք, որ հրշեջ ծառայությունը «Արմենիա միջազգային օդանավակայաններ» ՓԲԸ-ի ենթակայության տակ է մեկ տարի և ընկերությունը 3.500 մլն դոլարի ներդրում է արել այդ ծառայության կայացման համար:

Մովսեսյանի խոսքով, եղանակը չոր է, թռիչքի պահին տեսանելիությունը եղել է 3.5 հազար մետր: Հայկական կողմի հետ կապված որևէ խնդիր չի եղել: Նշենք, որ ինքնաթիռը տեխնիկական զննում է անցել փետրվարին: Օդանավը 1999 թ. արտադրության է, 48 ուղևոր տարողությամբ, օդաչուներն այս ինքնաթիռի հետ աշխատել են մեկ տարի: Անձնակազմի բելոռուս օդաչուները թռիչքից առաջ անցել են բժշկական զննություն, նրանց մոտ որևէ շեղում չի գրանցվել: Ինքնաթիռի սև արկղերի վերծանումը սկսվել է օպերատիվ կարգով, բայց թե որքանով է դրանց ինֆորմացիան պահպանվել, դեռ հայտնի չէ:

Հայաստանի ավիացիոն իշխանությունները մտադիր են քննությանը ներգրավվել նաև Միջազգային ավիացիոն կոմիտեի ներկայացուցիչներին: Ա. Մովսեսյանը նկատեց, որ հայկական կողմը ընդհանրապես ծանոթ չէ այդ տիպի ինքնաթիռներին:
ՔԱԳՎ պետի խոսքով, դեպքից 30-35 րոպե անց դեպքի վայր են ժամանել ինքը և ոստիկանապետ Հայկ Հարությունյանը: Ավելին, հանրապետության նախագահի մոտ դեպքի առթիվ արդեն արտակարգ խորհրդակցություն է եղել:

Ա. Մովսեսյանը նաև հայտնեց, որ դեպքի մասին տեղեկացվել են ինքնաթիռն արտադրող կանադական և շահագործող բելոռուսական ընկերությունները:

ՔԱԳՎ պետի հրապարակած տվյալներով, 18 ուղևորների թվում եղել են Բելոռուսի, Ուկրաինայի և Ռուսաստանի մեկական քաղաքացիներ, Վրաստանի հինգ քաղաքացի և Հայաստանի 10 քաղաքացի: Այս երկրների դեսպանատներն այդ մասին տեղյակ են պահվել: «Զվարթնոցի» աշխատանքը ժամը 11-ից վերականգնվել է:

ԳՈՂՈՒԹՅԱՆ ՓՈՐՁ` ՀՀ ԳԼԽԱՎՈՐ ԴԱՏԱԽԱԶԻ ԲՆԱԿԱՐԱՆՈՒՄ
Փետրվարի 15-ի լույս 16-ի գիշերը՝ ժամը 02:15-ի սահմաններում, անհայտ անձը, գողություն կատարելու նպատակով, մուտք է գործել ՀՀ գլխավոր դատախազ Աղվան Հովսեփյանի բնակարան: Անծանոթ անձին նկատել է Ա.Հովսեփյանի որդին՝ Նարեկ Հովսեփյանը, ում հաջողվել է կանխել հանցագործության կատարումը եւ նրա փախուստը, չնայած ցուցաբերված դիմադրությանը: Այս մասին հայտնում են Գլխավոր դատախազությունից:

Ահազանգի հիման վրա, դեպքի վայր ժամանած օպերատիվ-քննչական խմբին հաջողվել է պարզել, որ անծանոթը ՀՀ քաղաքացի Արտակ Կարապետյանն է (ծնված՝ 1976թ.), նախկինում երեք անգամ դատված:

Ա.Կարապետյանն առաջին անգամ դատապարտվել է ՌԴ Մոսկվայի մարզի Ռամենսկի ժողովրդական դատարանի կողմից 6 տարվա ազատազրկման՝ ավազակային հարձակում կատարելու համար: Երկրորդ անգամ դատապարտվել է ՀՀ քրեական եւ զինվորական գործերով վերաքննիչ դատարանի կողմից՝ դիտավորությամբ առողջությանը միջին ծանրության վնասվածք պատճառելու համար` 2 տարվա ազատազրկման, իսկ երրորդ անգամ՝ Երեւան քաղաքի Արաբկիր եւ Քանաքեռ- Զեյթուն համայնքների առաջին ատյանի դատարանի կողմից՝ կազմակերպված խմբով խոշոր չափերով գողության, գողության փորձի համար՝ 4,5 տարվա ազատազրկման: Ա.Կարապետյանը պատժի կրումից պայմանական վաղակետ ազատ է արձակվել 27.04.2007թ.՝ ունենալով 9 ամիս 10 օր պատժի չկրած մաս:

Ըստ գլխավոր դատախազության հաղորդագրության, Ա.Կարապետյանը բերման է ենթարկվել ՀՀ ոստիկանության Կենտրոնի քննչական բաժին: Նրա մոտ, անձնական զննությամբ, հայտնաբերվել եւ առգրավվել է մեկ զույգ սեւ գույնի բրդյա ձեռնոց, մեկ հատ ծալովի, գաղտնի փականով, 7,5 սմ երկարությամբ շեղբով, լապտերով դանակ, 500 ՀՀ դրամ:

Դեպքի առթիվ Կենտրոնի քննչական բաժնում հարուցվել է քրեական գործ՝ ՀՀ քրեական օրենսգրքի 34-177-րդ հոդվածի 2-րդ մասի 3-րդ կետով, նշանակվել են դատաբժշկական, դատահետքաբանական, դատակենսաբանական, մանրաթելային փորձաքննություններ: Ա.Կարապետյանը 16.02.08թ. ձերբակալվել է: Միջոցներ են ձեռնարկվում դեպքի բոլոր հանգամանքները պարզելու ուղղությամբ:

Աղբյուր` Panorama.am

ՀԱՅԱՍՏԱՆԻ ԱՄԵՆԱՏԱՐԵՑ ՄԱՐԴԸ 117 ՏԱՐԵԿԱՆ Է
ՀՀ ոստիկանության անձնագրային և վիզաների վարչության պետ Ալվինա Զաքարյանն այսօր լրագրողներին ներկայացրեց լրագրողների հետ վերջին հանդիպումից հետո 2008 թ. փետրվարի 19-ին կայանալիք ՀՀ նախագահի ընտրությունների ընտրացուցակների կազմման և ճշգրտման ուղղությամբ կատարված աշխատանքները:

Համաձայն դրանց, տպագրվել է 18 տարեկանից բարձր 14.996 ՀՀ քաղաքացու անձանգիր: Ստուգումների և ՔԿԱԳ մարմինների կողմից տրամադրված տվյալներով որպես մահացած հայտնաբերվել և համակարգչային բազայում ոչնչացվել կամ անվավեր է ճանաչվել 6161 անձնագիր: Ընտրողների ցուցակներում ընդգրկվելու համար հայտ է ներկայացրել հաշվառում չունեցող 177 քաղաքացի:

Ըստ Ալվինա Զաքարյանի, կենտրոնական ընտրական հանձնաժողովին է տրամադրվել ընտրողների թիվը` ըստ ընտրատարծքների և ընտրատեղամասերի: Ստացվել է19.350 դիմում` փաստացի բնակության վայրի ընտրացուցակներում ցրանցվելու մասին:

Ի դեպ, ի պատասխան լրատվամիջոցների հայտարարությունների, թե ընտրացուցակներում գրանցված են 150 տարեկաններ, ոստիկանության անձնագրային և վիզաների վարչության պետն ասաց, որ Հայաստանում ամենատարեց մարդը 117 տարեկան է, իսկ 100 և ավելի տարիքի կա 824 քաղաքացի, որից 2-ը երեկ Իջևանում մահացել է:

Ալվինա Զաքարյանը վստահեցմամբ, ընտրություններից երկու օր առաջ վերջնական ցուցակները, ինչպես նաև լրացուցիչ ցուցակները կփակցվեն ընտրատեղամասերում:

Ինչ վերաբերում է հիվանդանոցներում ստացիոնար բուժում ստացող քաղաքացիների ընտրությանը, ապա Ա. Զաքարյանի խոսքով, դա կատարվելու է նրանց դիմումի հիման վրա: Այսպիսով, Նախագահական ընտրություններին հիվանդանոցներում կմասնակցեն միայն ցանկացողները, իսկ նրանց վերջնական թիվն առայժմ հայտնի չէ:
Հիշեցնենք, որ կազմավորել են թվով 1923 ընտրական տեղամաս, ընտրությունների նախնական ցուցակներում ընտրողների թիվր փետրվարի 8-ի դրությամբ կազմել է` 2.320.375:

Արևմուտքն ամեն ինչ անում է Սերբիան տապալելու համար.

Արևմտյան երկրներն ամեն ինչ անում են, որպեսզի տապալեն Սերբիային որպես Ռուսաստանի պոտենցիալ ամենալուրջ դաշնակիցներից մեկին:
Ուղղափառ սերբերը Ռուսաստանին և ռուս ժողովրդին մեծ համակրանքով են վերաբերվում, այդ պատճառով էլ Ռուսաստանի այս հենարանն Արևմուտքը կփորձի որքան հնարավոր է արագ ոչնչացնել կամ էլ գոնե հնարավորինս թուլացնել նրա դիրքերը:

ԱՄՆ ԿՈՆԳՐԵՍԱԿԱՆՆԵՐԸ ԶԳՈՒՇԱՑՆՈՒՄ ԵՆ ՔՈՆԴՈԼԻԶԱ ՌԱՅՍԻՆ ՂԱՐԱԲԱՂՈՒՄ ՊԱՏԵՐԱԶՄԻ ՎԵՐՍԿՍՄԱՆ ՎՏԱՆԳԻ ՄԱՍԻՆ
Երեւան (Երկիր) - ԱՄՆ 52 կոնգրեսականներ նամակով դիմել են ԱՄՆ պետքարտուղար Քոնդոլիզա Ռայսին, որում տեղեկացնում են Ադրբեջանի կողմից Ղարաբաղում պատերազմ վերսկսելու սպառնալիքների մասին:

Ինչպես հաղորդում է ՀՅԴ Ամերիկայի Հայ Դատի հանձնախումբը, նամակի նախաձեռնողները ԱՄՆ Կոնգրեսի Հայաստանին աջակցող խմբի համանախագահներ Ջո Նոլենբերգն ու Ֆրենկ Փալոնեն են: Կոնգրեսականները նշում են, որ պաշտոնական Բաքուն խարխլում է Հարավային Կովկասում խաղաղության եւ կայունության հաստատմանն ուղղված` ԱՄՆ վարչակազմի ջանքերը:

«Ադրբեջանը արդեն տարիներ շարունակ պատերազմով սպառնում է Հայաստանին: Սակայն վերջին հայտարարությունները, որ արվել են բարձրաստիճան պաշտոնյաների կողմից, ապացուցում են, որ հռետորությունը վերածվել է շատ իրական եւ վտանգավոր սպառնալիքի»,-նշվում է ԱՄՆ պետքարտուղարին ուղղված նամակում:

Փետրվարի 15-ին Կոնգրեսում տարածվել է նաեւ Հայաստանին աջակցող խմբի մեկ այլ նամակ, որում առաջարկվում է նշել Լեռնային Ղարաբաղի ազգային-ազատագրական շարժման 20-ամյակը: «Որպես ամերիկացիներ` մենք գնահատում ենք Լեռնային Ղարաբաղի բնակչության խիզախությունը ժողովրդավարությանը սատարելու եւ ժողովրդական շարժումների առաջացման գործում, որոնք տարածվեցին ԽՍՀՄ բոլոր նախկին հանրապետություններում եւ Վարշավյան պայմանագրի երկրներում: Մենք գտնում ենք, որ այդ շարժումը ոչ միայն ազատություն բերեց Լեռնային Ղարաբաղի ժողովրդին, այլեւ իր ներդրումն ունեցավ աշխարհի անվտանգության ապահովման գործում: Դիմակայելով ագրեսիային, շրջափակմանը եւ այլ մարտահրավերների Ղարաբաղի ժողովուրդը ժողովրդավարություն էր կառուցում, նպաստում շուկայական տնտեսության հաստատմանը եւ կառուցողական դիրքերից համագործակցում միջազգային հանրության հետ` տարածաշրջանում խաղաղության եւ համագործակցության հաստատման համար»,-ընդգծվում է նամակում:

ՎԵՐՋԻՆ 15 ՏԱՐՎԱ ԸՆԹԱՑՔՈՒՄ ՀԱՅԱՍՏԱՆՈՒՄ ՓԱԽՍՏԱԿԱՆԻ ԿԱՐԳԱՎԻՃԱԿ Է ՍՏԱՑԵԼ 21 ՄԱՐԴ
Երեւան (Երկիր) - 2007թ.-ին ՀՀ տարածքային կառավարման նախարարության աշխատակազմի միգրացիոն գործակալության ապաստան հայցողների բաժինը օտարերկրյա քաղաքացիներից ստացել է 289 դիմում, այդ թվում` 271-ը ժամանակավոր ապաստանի, իսկ 18-ը փախստականի կարգավիճակ ստանալու համար: Ինչպես «Նոյյան տապան»-ի թղթակցին հայտնեց բաժնի պետի տեղակալ Ռուզաննա Պետրոսյանը, ժամանակավոր ապաստան հայցողները Իրաքի քաղաքացիներ են, որոնց տրվել է ապաստանի իրավունք` 1 տարի ժամկետով: Իսկ փախստականի կարգավիճակ ստանալու համար դիմողներից ընդամենը 1-ին է այդ կարգավիճակը տրվել:

Ռ.Պետրոսյանը նշեց, որ ապաստան հայցող անձանց մուտքը Հայաստան սկսվել է հիմնականում 1993թ.-ից. մինչ օրս 147 ապաստան հայցողներից փախստականի կարգավիճակ է տրվել միայն 21-ին: Ըստ նրա` փախստականի կարգավիճակ ստանալու համար գործակալություն են դիմում հիմնականում Իրաքի, Իրանի եւ Պակիստանի քաղաքացիներ: Կոնկրետ գործերի ուսումնասիրությունը ցույց է տալիս, որ այդ անձինք իրենց մշտական բնակավայրերը լքում են սոցիալ-տնտեսական ծանր պայմանների, քաղաքացիական պատերազմի, զինված հակամարտությունների պատճառով եւ Հայաստանը հիմնականում ընտրում են որպես տարանցիկ երկիր` հետագայում արեւմուտք մեկնելու համար:

Նշվեց նաեւ, որ ապաստան հայցողները մեկ ամսով տեղավորվում են 2000թ.-ին ստեղծված հատուկ կացարանում` մեկամսյա ժամկետում բժշկական զննում եւ փաստաթղթային ստուգումներ անցնելու նպատակով: Այնուհետեւ, մինչեւ փախստականի կարգավիճակ ստանալու վերաբերյալ դիմումների քննարկման ավարտը, նրանք տեղավորվում են ժամանակավոր կացարաններում: Ռ.Պետրոսյանը նշեց, որ ապաստան հայցողները ստանում են փախստականի կարգավիճակ հայցողի վկայական, միանվագ դրամական օգնություն` 10 հազար դրամ, թարգմանչական եւ իրավաբանական անվճար ծառայություններ: